Daily Newspaper

Mizoram Governor-in Mizo tawng leh English a sawimawi

16

Mizoram Governor P.S.Sreedharan Pillai chuan Mizoramah zirna thar atan Mizo tawng leh English hman a tul tih a sawi.

He thu hi nimina National Education Policy 2020 chungchanga President Ram Nath Kovind kaihhruaina hnuaia State leh UT-a Governor leh Lt. Governor te nena Video Conference kaltlanga ngaihdan sawihonaah Mizoram Governor chuan a sawi.

Video conferencing-ah hian state chief minister thenkhat, education changtute leh state H&TE minister te an tel a, he hunah hian H&TE minister Dr.R.Lalthangliana chuan Governor hi a tawiawm a ni.

Sawihona neih hma hian Prime Minister Narendra Modi chuan NEP – 2020 thiltum pawimawh zual te a sawi a. Union Education Minister Ramesh Pokriyal ‘Nishank’ pawhin thuhmahruai a sawi bawk a ni.

Governor P.S.Sreedharan Pillai chuan National Education Policy -2020 chu Mizoram sawrkar chuan tha a tih thu a sawi a. Mizoramin a kalpui theih dan turin her rem ngai lai te pawh a awm a; hengte hi ngun takin H&TE minister Dr.Lalthangliana kaihhruaina hnuaiah zir chian mek a ni, a ti a; Hindi tawng thiam pawimawhzia Mizoramah pawh inzirtir mek a ni, a ti bawk.

Tun dinhmunah Mizo mipuite tawng hman thiam chu English leh Mizo tawng a nih avangin NEP – 2020 hman hunah pawh a remchan dan anga tamin Mizo tawng hman tum a ni a; a tul angin English nen hman pawlh a ngai dawn a ni, Governor chuan a ti a. Ram inpumkhatna kawng atan NEP – 2020 hman tangkai tha a tih thu a sawi tel a, hei hi tihhlawhtlin a nih theih nan NEP – 2020 ah Student Exchange programme te pawh telh theih ni se tha a tih thu a sawi bawk a ni.

Video conference hi hun thumah then a ni a. Hawnna inkhawmah State hrang hrang aiawh ten an state ngaihdan an sawi a. Hemi hnuah hian Special Session neih a ni a; he hunah hian NEP – 2020 duangtu zinga a khaipa ber Dr. K.Kasturirangan, Chairman, Committee for draft NEP pawhin thu a sawi a ni.

NEP-2020 sawihonaah hian Prof. K.R.S. Rao, VC, MZU, H&TE Commissioner & Secretary Biaktluanga, Prof. J.K. Patnaik, Pro VC, MZU, Dr. C. Dothanga, Acting VC, ICFAI, Mizoram te pawhin Governor an tawiawm bawk a ni.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy