Mizoram hauh china chengte
dinhmun zirchiang zo tawh
Ramri chungchanga Mizoram leh Assam aiawhte inbiakna kal mekah Mizoramin a rama a pawm chin huamchhunga khaw awm leh a mi chengte chanchin an lakkhawm chu Assam sawrkar hnenah hriattir a ni tawh tih Home minister Lalchamliana chuan a sawi.
The Aizawl Post-in a zawhnaah Home minister chuan, Mizoramin a ram chin nia a pawm chin chhunga khaw awm leh a michengte chanchin sawrkarin a lakkhawm hi kumin February thla laihawl vel khan Assam sawrkar hnenah an thlen tawh a, ramri chungchanga nikum November-a state pahnih aiawh inbiak a nih khan, thla thum chhunga report tura tih a nih angin, thla thum ralhmain survey report hi Assam sawrkarah an pe tih a sawi. He an report behchhan hian kumin March leh April thla chhungin a hmunah state pahnih aiawh hian spot verification neih leh tur a ni a, Assam lam hian thu an la rawn neih rih lo a, an ngaichang mek, tiin a sawi a ni.
2022 November 17 khan Mizoram leh Assam state pahnih aiawhte hi ramri chuangchanga Gauhati-a inbiak hnu ah thuchhuah intawm an siam a. Mizoramin a ram chin nia a pawm, 1875 ramri kham huamchhunga khaw awmte leh a huamchin – geospatial extent, heng hmuna cheng mihring chanchin leh hnam awm – ethnicity leh chanchin dangte chu thlathum chhunga lakkhawm nise an ti a, hemi bawhzui hian Mizoram sawrkar hian hma a la zui zel tih Home minister hian a sawi.
Home commissioner & secretary H Lalengmawia chuan, Mizoram hauh china awmte hi an zat tak tihchian a har a, a then an survey laia la awm si, tuna an chenna rauhsan leh ta te pawh an awm tiin, The Aizawl Post zawhna a chhang bawk.
Mizoram hauh china chengte dinhmun zirchiang zo tawh
