Mizorama hmasawnna ruhrel din zingah zaa za deuhthaw chu Congress sawrkar laia siam a ni tih Congress Legislature Party leader Zodintluanga chuan a sawi.
Ningani khan Mizoram Pradesh Youth Congress Committee (MPYCC) chuan State Convention an nei a. MPCC president Lalsawta leh CLP leader hian an hmanpui.
MPCC president chuan ram rawngbawl turin Lalpa’n thalaite a ko nia sawiin, politics chu ralthlir ringawt chuan awmzia a nei loa, thalai mithiam, politics ngeihven lem lo te pawh, kan ram chhe mek siamtha turin a chhunga an luhchilh ve a ngai tawh tih a sawi. Kan state bakah ram pumah BJP sawrkarin lal a hrawt mek a; kan ram, hnam leh sakhua nasa taka suasamin, kan dinhmun tawn mek atanga kan tal chhuah theihna tur leh kan ram siamthatna atan ngaihtuah seng turin, Lalsawta ni loin Pathianin a ko che u, tiin thalaite a cho.
CLP leader Zodintluanga chuan Mizorama political party dangten an thalaite ram hruaitu atan an chher chhuak ngai meuh loa. Congress party chauhin thalaite ram hruaitu atan a chher chhuak thin, MLA leh minister an neih tawh zingah hian Congress Thalai chhulchhuak zaa 40 dawn an ni tih a sawi.
Tuten emaw Congress party chu engmah ram tana tih nei lo angin sawi thin mah se, tuna Mizoram hmasawnna ruhrel lian kan neih zawng zawng zinga zaa za deuhthaw chu an sawrkar kutchhuak a ni tih Congress minister hlui hian a sawi a. Ram rotling an hnutchhiah teuh tih a sawi a ni.
Congress party chuan NLUP sem an intiam angin sawrkar kaltaah khan chhungkaw 130000 chuang NLUP an pe a; MNF sawrkar chuan SEDP cheng nuai 3 sem an intiam laiin, an thlen chin chu kan hmu vek tih a sawi. “Tlangram lo neih kalphung tihtlem tumna chu NLUP hian a hlawhtlinpui nia ngaih a ni a. Economic Survey tarlan danin NLUP hunlaiin Mizoramah tlangram lo neih hi zaa 55.36 in a tlahniam hman,” a ti.
Mipuiin Congress sawrkar leh hun an nghakhlel leh tawh nia sawiin, “An nghahhlelh chhan chu, thalai zingah pawh a thiam thiam ten hna an hmu leh dawn tih hi a ni,” Zodintluanga chuan a ti.
MPYCC State Convention-ah hian AICC Mizoram election observer Sachin Rao bakah IYC secretary Mizoram i/c Sarifa Rahman te pawhin thu an sawi a ni.
Mizoram hmasawnna ruhrel lian zaa za deuhthaw kan kutchhuak – CLP leader
