Daily Newspaper

Mizoram hrek tum vangin Tripura kawng dang

POST NEWS SERVICE

9

Assam-in Mizoram hrek tumin an state atanga Mizoram pawhtu kawngpui an dang a, Tripura lam atangin Mizoramin an mamawh an chawlut ang tih hlauvin Assam atanga Tripura pawhtu kawng pawh an dang. Mahse Thawhtanni chhun kha chuan an dang leh tawh lo nia hriat a ni.

Tripura-a Mizoram hnaih khua Damcherra leh Dharmanagar te leh Assam lam inkalpawhna kawngpui chu August ni 1 khan mi thenkhatin an dang a, August ni 2 zing lamah pawh khan an la dang nia hriat a ni. Chhun lamah chuan an dang tawh lo.

Damcherra leh Dharmanagar te hian Assam atangin ni tin mamawh thil hi an lalut a, Assam kaltlangin hmun danga mi an lalut bawk. Darjeeling alu te pawh Assam kaltlangin an la thin. Tun hnaiah Damcherra leh Dharmanagar-ahte bungraw phur lirthei a lut nasa a, Mizoram thil tur a nih ringin Assam lam hi an lawm ta lo nia hriat a ni.

Assam-in bungraw phur lirthei an lo en a, Mizoram challan a nihin an dang tih thu tun hnaia sawi hi chu, heng hi Damcherra leh Dharmanagar sumdawngte kaltlang ni lovin Mizoram mi thenkhatin Tripura paltlanga Assam lam atanga bungrua lakluh an tumte a ni tih thu dawn a ni.

Tripura-in Assam an pawhna kawnga Churaibari khuaah Tripura-a lirthei lut tur hi an dang a, Patharkandi velah an dang bawk. Hei hi Karimganj District ve ve a ni a, Churaibari hi a lehlam Tripura, a lehlam Assam an ni.

Kawng dangtute hian Mizoram tana Tripura an lo inhawn avanga an lungawi loh thu te bakah Tripura-in Mizoram atanga chhuak Tuikuk-te Tripura-a a awmtir avanga an lungawi loh thu te an sawi a, tun hnaia Damcherra vel atanga Chorai-te Assam-a an tlanluh thu thlengin an hmer tel.

Assam hian Vairengte pawhtu leh Kanhmun pawhtu kawngpui an dang mek a, heng kawngpui atang hian Mizoramah lirthei a lut rih lo.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy