DoNER ministry atanga sum an pek chu Mizoram sawrkarin a hmanna tur angah a hmang tha lo hle niin DoNER minister Jyotiraditya Scindia chuan a sawi.
He thu hi New Delhi-a amah hmutu BJP Mizoram hruaitute hnenah Jyotiraditya Scindia hian a lo hrilh a. Ministry-in Mizoram tan sum an pekte an hman that loh thu sawiin, BJP Mizoram chu DoNER-in state hnena fund a pekte ngun taka lo enzui turin a chah.
BJP State president Vanlalhmuaka chuan DoNER minister hi a ministry-a Mizoram project tang mek leh hmalak mekna a sawipui a ni.
Minister for Labour & Employment, Youth Affairs & Sports Mansukh Mandaviya an hmuhnaah Mizoram kuthnathawktute dinhmun chawikan dan tur, infiamna lama talent tha tak tak nei thalaite chawikan dan tur, sport infrastructure mamawh dan an thlen a. An thu thlen chu a hlamchhiah dawn lo tih a lo hrilh a ni.
Agriculture & Farmers Welfare leh Rural Development minister Shivraj Singh Chauhan an hmuhnaah Vanlalhmuaka chuan Mizoram loneitute dawmkan dan tur, PM Kisan leh FPO chungchang, CAU hnuaia constituent college – Selesih Vety College leh Horticulture College Thenzawl chungchang, loneitu tam zawkin an thar that thin em em – sawhthing, hmarcha, Dragonfruit, hmunphiah adt chingtute hmakhua a sawipui a. Rural Development lam PMAY (G), PMGSY phase IV, rain water harvesting chungchang an sawi bawk.
Hei bakah hian Union Home secretary, Ministry of Border Management pawh hmu in, Indo- Bangladesh border fencing chungchang a sawipui a ni.
Mizoram-in DoNER-in sum a pek a hmang tha lo tih minister-in sawi
