Mizoram inthlan vote chhiar hun sawn

lection Commission of India (ECI) chuan Mizoram inthlan vote chhiar hun a sawn a, December ni 4-ah vote hi chhiar a ni ang.
Vote chhiar hun tura tih hi December ni 3 a ni a, Chawlhni a nih avangin NGO Coordination Committee-in Chawlhni ni lo Inrinni ni lova sawn turin an ngen a, Zirtawpni pawh hian chhun lamah lungawi lohna an lantir. Zan tirah ECI-in thu thar an nei ta a ni.
Zirtawpni zan, zan tir lamah khan ECI thu thar hi Mizoramin a hria a, election department lam pawhin dar 8 velah ECI thu leh hla hi an hria.
Hemi chungchanga ECI press note, December ni 1-a an chhuahah chuan, tun hnaia state thenkhat inthlan vote chhiar hun tura tih December ni 3 chu Chawlhni a nih thu leh, a ni hi sawn tura ngenna an dawn thu te, a bikin Chawlhni-a vote chhiar hi Mizoram mipuite tan a buaithlak thu te an sawi a, Mizoram vote chhiar ni tura tih chu December ni 4-ah sawn a nih thu an ziak.
Ningani tlaiah khan ECI hi an thu a, Zirtawpni-ah an thu bawk. Mizoram chungchang an ngaihtuah hun erawh hriat a ni lo.
Vote chhiar ni sawn tur hian a tirah Mizoram Kohhran Hruaitute Committee thlazar hnuaiah ngen a ni a, chumi hnuah NGO Coordination Committee kutah dah niin, anni hian Thawhlehni khan Delhi-ah kalin ECI hotute hi an kawm a ni. Chumi hnuah Aizawlah lungawi lohna lantir a ni leh bawk.