August 16-18, 2024 chhunga Panchkula, Haryana lama khelh zawh tak
All India Karate Championship-ah Mizoram Karate Team chuan gold medal panga, silver medal pali leh bronze medal pahnih an hlawhchhuak.
All Mizoram Karate Association (AMKA) president R. Zomawia chuan tun ang reng reng hian federation championship-ah an la chetha ngai lo tih sawi chungin ngawrh taka thla li chuang teh meuh training an kalpui chuan rah tha a chhuah niin a sawi a, chu bakah tum dang zawng aia player selection an uluk chu an hlawhtlin chhan nia sawiin, state championship medalist-te atanga uluk taka player selection kalpui thatleh a ni kha an tisual lo tih a sawi.
Tuntuma Mizo senior medalist-te hi federation lamin uluk taka lo practice chhunzawm tura chahin, National Games-ah beiseina sang tak an neih thu pawh an chah a; tin, he’ng senior gold medalist-te hi doping test an neih sak nghal vek a, an bio data uluk takin an record bawk.
Championship chhung zawng hian AMKA senior vice president leh Karate Association of India senior vice president ni bawk C. Dosavunga’n a hmunah an player-te a uap reng a ni.
National Referee ‘A’ Grade leh Kata Judge ‘A’ Grade ni chunga national certified coach ni bawk Sensei Lalropuia Pautu, Upper Republic chu Karate Association of India Referee Commission member atan tuntum championship denchhena federation thukhawm chuan a appoint thar bawk.
Mizoram Karate Team hi Lalramthara, Tuikual South kaihhruaina hnuaiah fehchhuakin; team official dang Sensei Lalropuia Pautu leh Sensei Malsawmzualate’n an tawiawm tel; bawk a ni.
India ram hmun hrang hrang atanga infiammi 1800 chuang telna National Karate Championship-ah hian All Mizoram Karate Association leh Mizoram State State Sports Council thawkdun chuan player 24 leh official pathum a tirchhuak a; vawiinah Aizawl an luh hman beisei a ni.
Mizoram Karate Team che\ha
