Ram pum huap faina lama intihsiaknaah Mizoram chhunga khawpui tia chhal theih chin zingah Aizawl chu fai bera thlan a ni a; Lunglei chu India hmarchhak zinga mihring sing nga leh nuai khat inkar chenna khawpui zingah fai bera thlan a ni.
India ram puma faina lama inelna lian ber – Swachh Survekshan 2023 award chu Ningani khan New Delhi-ah sem a ni a. Ministry of Housing & Urban Affairs buatsaih fai inelnaah hian third party monitoring team-ten tehna hrang hrang hmanga an endikna atanga result hi siam thin a ni. He intihsiaknaah hian India khawpui (cities leh urban towns) endik vek an ni a, Survekshan vawi 8-na 2023 chhunga inelnaah hian India ram chhunga khawpui 4477 an tel a ni.
Lawmman hi chi hrang hrang, ram pum huap chi 24, zone bika siam chi 20 leh state chhung huap chi 54 a awm a. Ram pum huapa khawpui fai berah Surat (Gujarat) leh Indore (Madhya Pradesh) te chu pakhatna ve ve ah puan an ni a. Pahnihna hranpa awm loin pathumna chu Navi Mumbai a ni. Maharashtra, Madhya Pradesh leh Chhattisgarh te chu ‘Best Performing State’ top 3 an ni.
Ram pum huap bakah zone hrang hranga lawmman te, state chhung bika khawpui fai lawmman te a awm a. Lunglei hian hmarchhak khawpui, mihring 50000 – 100000 inkar cheng zingah khawpui ber lawmman la in, Mizoramah mi nuai khat aia tlem chennaah fai ber lawmman a la tel bawk.
Lawmman semna hi India president Droupadi Murmu leh sawrkar mi pawimawh dangten an hmanpui a. Lunglei lawmman dawn hi Lunglei Municipal Council chief executive officer R Vanlalsawta’n a dawng a, Aizawl lawmman lak hi UD&PA director Dr Andrew H. Vanlaldika’n a dawng ve thung a ni.