Daily Newspaper

Mizoram larsap 22-na atan Dr Kambhampati Haribabu lalut

39

Mizoram larsap 22-na atan Dr Kambhampati Haribabu chu Thawhtanni khan Raj Bhavan-ah rinawmna thu tiamtira lakluh a ni.

Dr Kambhampati Haribabu hian Thawhtanni chhun khan Lengpui Airport atangin Mizoram a rawn lut a. Airport-ah hian chief minister Zoramthanga, minister Dr R. Lalthangliana, chief secretary Lalnunmawia Chuango, Mizoram Director General of Police SBK Singh, Secretary to Governor V.Lalsangliana, 23 Sector Assam Rifles sector commander Brig. Digvijay Singh leh official dangten an lo hmuak a. Raj Bhavan-ah deputy chief minister Tawnluia, Home minister Lalchamliana leh Governor’s Secretariat thawktuten an lo hmuak a ni.

Covid-19 hri darh zelah Aizawl khawpui huamchhungah July 19 atanga sawrkarin inkharkhip bur a puan avangin larsap thar lakluhna inkhawmah hian sawmbik mi tlemte chiah an tel a. Gauhati High Court chief justice aiawhin Justice Michael Zothankhuma, Gauhati High Court judge chuan rinawmna thu tiamtirin Dr Kambhampati Haribabu hi larsap atan a lalut a, President of India-in Dr Kambhampati Hari Babu, Mizoram larsap atana a ruatna chu chief secretary-in a chhiarchhuak a ni. Hemi hnu hian Upper Lawn Raj Bhavan-ah larsap hi thla lakpui a ni.

Larsap thar lakluhna inkhawmah hian chief minister Zoramthanga, deputy chief minister Tawnluia, Assembly speaker Lalrinliana Sailo, council of minister-te, chief secretary, DGP, political party aiawh hruaitu pakhat theuh, pawl lian deuhte hruaitu pakhat zel te chiah an tel a. Chief minister hlui, MPCC president Lal Thanhawla pawh a tel a ni.

Kum 1953 June 15 khan Kambhampati Haribabu hi Thimmasamudram, Prakasam District, Andhra Pradesh-ah a piang a. A nu leh pate chu Kambhampati Venkateswarlu leh Seethamma niin, a nupui Kambhampati Jayasree nen fanu pahnih an nei. An khuaah sikul a luh hnuah zirna sang zawk zir turin Visakhapatnam khawpuiah a insawn a. Andhra University-ah B.Tech (Electronics and Communication engineering), ME (Electrical & Control Systems) leh PhD (Control Systems) te tha taka zirchhuakin, zirtirtuah a tang chhunzawm a. Associate professor a nih hnuah pawh kum 24 chu he University chhunga engineering college-ah a thawk hman a; he hna a thawh lai hian mipui rawngbawlna huang zau zawkah luh duhin politics-ah a inhmang chho ta a ni.

Politics huanga a luh hnuah Visakhapatnam-I bialtu MLA a nih laiin kum 2003 khan Assembly House-ah floor leader a ni thin. Kum 2014 khan Andhra Pradesh BJP state president-a thlan a ni a; kum 2014 khan 16th Lok Sabha-ah Vishakapatnam khawpui bialtu Member of Parliament atan thlantlin a ni.

Mizoram larsap atan ruat a nih hma hian BJP National executive member (2018-2021) a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy