Mizoram leh Arunachal state din champha lawm
‘Ek Bharat Shreshtha Bharat’ hnuaia hmalakna, state puitlinga Mizoram leh Arunachal Pradesh hlankai an nih champha chu Thawhlehni khan Lok Bhavan-ah larsap Gen. Vijay Kumar Singh (Retd) hoin lawm a ni.
Larsap chuan state puitlinga hlankai an nih hnuah Mizoram leh Arunachal Pradesh-in chak takin hmasawnna kawng an zawh tih a sawi a. State pahnih chu ram leilung leh tribal hnam ziarang hausa tak nei an ni a, a ram leilung tlawhpawh mai harsat avang leh chhan dang dang vangin hun engemawchen ngaihthah ni mah se, tunhnaiah nasa takin hma an sawn tih a sawi a ni.
Mizoram leh Arunachal Pradesh chu India ram hmun pawimawh taka awm, Act East Policy-ah phei chuan hmun pawimawh chang an ni tih a. Ra, leilung hausakna leh mawina hman tangkai kawngah hmabak eng tak nei ve ve an ni tih a sawi bawk.
Arunachal Pradesh larsap Lt.Gen. KT Parnaik (Retd) thuchah thlirho a ni a. Govt T Romana College principal Dr Jenifer Lalbiakdiki leh MZU scholar, Arunachal Student Union Mizoram president Api Hiba ten state pahnih chanchin an sawi a. Mizoram leh Arunachal Pradesh chanchin pholanna video thlirho niin, Regional Institute of Paramedical and Nursing Sciences (RIPANS) leh Govt. T. Romana College zirlaiten Mizo leh Arunachali hnam lam an entir a ni.
Northeast Areas (Reorganisation) Act 1971 hnuaiah kum 1972 khan Mizoram chu union territory-a puan a ni a. India danpui siamthat vawi 53-na 1986 hmangin India ram state 23-na ni tura hlankai a ni. Arunachal Pradesh hi North-East Frontier Agency (NEFA) tih thin niin, kum 1972 khan NEFA chu union territory-ah hlankai a ni a. 1987 February 20 khan India danpui siamthat vawi 55-na 1986 hmangin India ram state 24-na a ni ta a ni.
Ek Bharat Shreshtha Bharat programme hian India rama state leh UT-a cheng hnam hrang hrang, hnam ziarang leh nunphung inang lo tak tak inkara inpawhna tha zawk siam leh an inkara inhriatthiam tawnna nasa zawk siam a tum a. He programme kaltlang hian India rama state leh UT tin din champha lawmna chu Lok Bhavan Mizoramah larsap kaihhruaiin June 2023 atang khan buatsaih thin a ni.
Mizoram leh Arunachal state din champha lawm
