Daily Newspaper

Mizoram leilung leh in hmun

33

Nimin khan Zemabawk Kananthar venga kawngchhak lam leimin tawlhin a thlang kawngkama cement concrete building pakhat chu a hnawl a. Kawngchhak lama lei tawlh intanna hmunah hian inhmun tur laih mek nia hriat a ni a. Inhmun tur laih avanga lei hi tawlh ta mai nge tih erawh sawi fak theih ni lo mah se, helai hmun vel leilung hi tunhma atanga che fo tawh, a ngheh loh avanga khawtlang hruaitute pawhin in rit tham sak an remtih vak lohna hmun kha a ni a. Kumin February thla pawh khan helai bawr velah tho hian mimal in sakna tur laih a nih avangin lei a tawlh a, chenna in pakhat chu a lo chim tawh bawk a nih kha.

Mizoram leilung ngheh loh dan hi mithiamten an sawi bakah, mit ngeiin kan hmu a, leilung nghet lo hi kan tuar mek bawk a. Leimin avanga kawng chhia te, leimin avanga chenna in chhiate kumtin a thleng a, a takin kan tawk mek reng a. Sawrkar pawhin building regulation te pawh a siam a, hmun thenkhatah chuan building regulation bawhchhiatna hi a thleng fo bawk awm e.

Abikin Aizawl khawpuia in sak danah hian Dan chu awm bawk mah se, a nihna anga zawm emaw, a nihna tur anga Dan kenkawh emaw hi a la harsa deuh niin a lang. Aizawl khawpui sawrkar AMC chuan “Site Development and Slope Modification Regulations, 2014” te pawh a siam tawh a. Ram leilung awihtlan ngheh leh ngheh loh te, in hmun laihna tur chi a nih leh nih loh ngun taka enfiah hnua in sak dan tur te pawh dan chhungah a awm vek niin a lang. Hetih lai hian, mimalin an in hmuna in sak phalna AMC atanga an lak hian, in an sakna tur hmun ngeh leh ngheh loh enfiah hna chu Geology & Mineral Resources Department mawhphurhna niin a lang a, in hmun tur laih chim a awm ta fo mai hi, helam enfiahtu lam hian tan an lak deuh chu a ngai ta niin a lang.

Chhiatna thleng tam tak hi chu khuarelin a ken ve hrim hrim a ni a, chutih laiin khuarel chhiatna anga ngaih theih, mahse han chhut chiana mihringten kan khuarel thil kan sawngbawl dan a dik loh avanga chhiatna lo thleng ta hi sawi tur a tam ta hle. Laipuitlang chhiatna angte pawh kha, a ram leilung nena inmil lo, building rit tak sak a nih vang leh, tuiluankawr mumal loh avanga a tawpa khatianga thleng ta kha niin a lang; chu chu khuarel ni lovin mihring siam a ni, kan ti thei awm e. Tun hnaia in hmun tur laih a nih avanga lei tawlh nghal mai thin a awm ta zut phei hi chu, tun aia kan fimkhur zual a ngaihzia lantirtu langsar tak a ni.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy