Mizoram hian mamawh bulpui, hlenchhuah hmasak ngai zual pali a nei a, chungte chu— Ei leh bara intodelh, Inkalpawhna tha neih, Power-a intodelh leh, ramri buai chinfel te hi a ni.
Khuarel chhiatna avanga kawngpui a chhiat chang te, ramri buai avanga kawngpui dan chah a nih a, economic blockade a thlen changte hian ei leh bara kan intodelh miau loh avangin kan nunna hnar ber ei leh bar tur chawkluh dan turah kan buai nghal em em ringawt zel a. Ei leh barah tal lo intodelh tawh ni ila chuan, Power tha lo te, inkalpawhna kawngpui tha lo te, ramri buaite hi chu a tawrh dan dan a la awm thei zel. Chuvangin, kan buaina lian ber chu, ei leh bara kan la intodelh lo hi a ni. Kan rin pui ber buhfai ngat phei hi chu, leileta siam theih ram awl zau tak hi buhfai kan mamawh zat 50% tharchhuah theihna a ni tih a chiang a. Mahni rama thar chhuah ve theih reng si, state dang atanga chawkluh nan sum kan seng tawk tawk reng mai hi a uiawm mai ni lovin, kan buai phah nasa.
Inkalpawhna kawngpui tha kan neih loh avanga harsatna thleng zozai hi sawi sen pawh a ni lo. Infrastructure lian tham deuh han din ve dawn pawh ni ila, hmanrua phurh thlenna tur kawngpui tha kan neih loh avanga infrastructure tha kan neih loh phahna hi tam tak a awm.
Hmasawnna thar lo piang zelah, Power mamawhna a sang tual tual a, mahni rama siam chhuah ve theih reng si, state pawn lam tangin sum tam tak tak sengin Power kan lei tlut tlut reng a. Power lei nana sum hmanral zozaite hi hmasawnna hna thawh nan hmang thei ila, state chancgkang ber kan ni thei hial tawh ang.
Ramri a fel loh chuan a chhunga chengte an him lo. Ramri buai avanga harsatna leh tawrhna a takin kan tawng tawh, chhuan lo la awm zel turte tan ramri fel kan hnutchhiah a ngai; ramri buai chinfel hi nationalism huang chhung a ni.
Tun tum inthlanpuiah hian eng sawrkar pawh lo ding se, heng thil mamawh bulpui palite hi hna pui berah an rawn neih chat a ngai a ni e.
Mizoram mamawh thil pali
