Mizoram-Myanmar inkalpawhna kawng kharin nghawng nei hma

Kar hmasa lamah khan India sorkarin Mizoram leh Myanmar inkalpawhna kawng a khar a, ni hnih khat lekah a nghawng a lian hman hle.
Sorkar laipuia ministry of home affairs-in Champhai district-a Zokhawthar atanga Myanmar luhka a khar a, Mizoram lam leh Myanmar lamah nghawng a nei nghal a, mipui ni tin khawsak a nghawng nghal.
Zokhawthar hi |iau lui kama awm a ni a, a ral lehlam Myanmar lam |iau kamah Khawmawi khua a awm. Khawmawi leh a chhehvelte leh Zokhawthar chu inkalpawh mamawh, inthian tha, chhung leh khat an ni. Hnam khat nih vangin free movement regime a awm a, passport leh visa tel lova inkalpawh thei an ni. Tun hnaiah India sorkarin inkalpawh phalna hi tihtawp a tum bakah Mizoram leh Myanmar inkarah pal hung a tum bawk. Chutiang karah chuan Lok Sabha inthlan dawnah khan sawi lawk awm lovin ministry of home affairs-in Zokhawthar leh Khawmawi inkar kawng, an inkalpawhna lei a khar thut a ni.
Khawmawi hi khawchhak bungraw hrang hrang Mizorama zawrh tur an chhekna hmun a ni a, Zokhawthar-ah lalutin, chuta tang chuan hmun hrang hrang an panpui thin. Khawmawi leh a chhehvelte leh Zokhawthar mipuite’n hei hi kawng hrang hrangin eizawn nan an hmang a, kawng khar a nih hian an tuar nghal hle.
Khawmawi khua, lirthei lianpui pui din khup thinna khua a ruak huai a, dawrte hawng mah se a hma angin dawrtu an tam lo. Dawr neite chuan dawrtu an neih loh thu an sawi a, Mizoram atanga kal an awm loh avangin 50% velin dawrtu an tlahniam tih te an sawi.
“Inhralh a har khawp mai, Mizoram atanga rawn kal an awm loh chuan dawrtu kan nei lo titih nghala mai a. Hei hi keini’n kan tuar a ni mai lo a, rei lo teah Mizoram lamin an tuar ang, thla khat vel hnuah chuan neih loh in ngah ngawt ang,” Khawmawi-a dawrkai pakhat Vala chuan a ti.
Khawmawiah hian two wheeler taxi ang deuhvin bike an tlan a, “One two fai” an tih mai chu mipui hman theihin an awm. Inkalpawhna kawng khar a nih hnuah a hmang duh an tlem nghal a, an sum lakluh a tlahniam nghal.
Inkalpawhna kawng hawn a nih chuan India pawisain ni khatah Rs 3000 te, chu aia tam te an hlawh thei a, kawng khar a nih hnuah chuan ni khata Rs 500 hlawh tlin loh ni te an nei.
Dawr a lun lo a, bike hmang duh an tlem a, mutia hna thawh tur a vang a, Khawmawi lamah sum lengvak a tlem nghal tih chu an sawi dan a ni.
Khawmawi leh a chhehvel hi Myanmar sipai sorkar paih tumtute’n an awp tawh a, sipai sorkar mi leh sate an um chhuak tawh. Hei vang hian an zalen phian a, an ralmuang rih bawk. Sorkar atangin hna leh ei leh in emaw sum leh pai emaw hmuh tur a awm lo a, Mizoram nena insumdawn tawnna hi an ei bel ber a ni.
Zokhawthar lam pawhin an tuar a, Myanmar atanga bungraw lakluh hi Zokhawthar mipuite eizawnna lian niin, a sumdawngah an tang lo a nih pawhin bungraw thiara inhlawh hi hna a tling. Mahse kawng khar a nih hnuah hna a vang nghal a, Zokhawthar a nghawng nghal.
“Kan inkalpawh theih loh chuan hna kan nei lo a ni mai a, hna a awm loh chuan rei lo teah kan pem darh mai pawhin a rinawm,” Zokhawthara cheng mi pakhat chuan a ti.