Mizoram Ombudsman rank chiang lo
Mizoramah kum 2013 atanga neih tan a nih hnu ah tun thlengin Ombudsman rank chu chiang taka sawifiah a ni lo.
Mizoram-in Ombudsman a neih mek C Lalthanmawia’n thuthar thehdarhtute a hrilh danin, Ombudsman (independent local body) hi mipuiin khawtlang roreltu – village council leh local council rorel dan leh kalphung leh an hmalak dana sawiselna/ lungawilohna thlena an zualko theihna turin Mizoram sawrkarin Act & Rules mumal tak siamin a din a ni.
Ombudsman a awm atangin complaint 76 thehluh a ni tawh a. Complaint an dawn tam ber hi VC/LC thiahsak tura hekna a ni. Fund hman dik loh lama complaint tlem an dawng tel bawk.
Ombudsman stutus chu a chiang lo viau tih sawiin, eng rank nge an nih tih tihchianna tak tak a awm loa, Ombudsman lo hi chu midang a ngheta thawk an awm lo tih a sawi. Larsap thurawn angin UD&PA atangin appoint an ni a. UD&PA, LAD leh AMC ten an mamawh hi an intum sem tih a sawi a ni.
State sawrkar hnuaia Ombudsman neih a tul chhan bulpui ber chu, Constitutional mandate – 73rd & 74th Constitutional Amendment Acts (1992) leh Article 243G & 243W phut angin, tualchhung inrelbawlna bulthut – grassroot level local self-governing institutions (VC leh Municipal Bodies ang chi) atanga thuneihna insemzai, hlemhletna leh thil dik lo/fel lo awm loa rorelna dik tak ram leh mipui tan kalpui a nih theihnan a ni tih C Lalthanmawia hian a sawi.
Ombudsman hi a hnena complaint thehluh chhuifiah leh ch?nfelna atan Court of Civil Procedure 1908 (Central Act V of 1908) hnuaiah Civil Court power pek a ni a. Thubuai ngaihtuah dan hi summary proceedings anga kalpui niin, Ombudsman judicial power hi ‘quasi-judicial power’ a ni tih a sawi bawk.
Mizoramah Ombudsman atan hian mi pali ruat an ni tawh a. R Lalhmangaiha, MCS (Rtd) chu ruat hmasak ber a ni a, 25.10.2013 atanga 04.03.2016 thleng a thawk. H Laizika, MCS (Rtd) ruat leh niin, 05.08.2016 atanga 28.02.2022 thleng; Sangdingliana, IAS (Rtd) chuan 01.04.2022 atanga 31.08.2025 thleng; tunah C Lalthanmawia, IPS (Rtd) hian 01.09.2025 ah office a luah tan.
Ombudsman ruattu committee-ah chief minister chu chairman a ni a, Assembly speaker leh opposition leader chu member an ni.
8 Ombudsman hnena complaint thehluh hma in concerned local authority (LC/VC) hnenah lungawilohna thu thlen hmasak phawt tur a ni.
8 VC/LC hnena lungawi lohna thu thehluh atanga thla khat ral hnuah, complaint thehluh a ni chung pawha chhanna hmuh a nih loh emaw chhan leh vang mumal awm loa an lo pawm lo a nihin emaw, local body chhannaah a lungawi tawk lo a nih chauhin Ombudsman hnenah complaint a thehlut thei.
8 Mi tu pawh local body (VC/LC) lakah lungawilohna a neih chuan, amahin emaw a aiawh zo ngei tura a ruat hmangin ziakin Ombudsman hnenah complaint a thehlut thei.
8 Complainant emaw a aiawhin emaw complaint chu Ombudsman hnena a thehluhin, a hming, address leh local body office hming leh hnathawktu thawhna local body, a complaint chhan chiang taka ziakin, lehkha tan chhan a neih ang ang thil tel tur a ni.
Mizoram Ombudsman rank chiang lo
