Daily Newspaper

Mizoram Police-a tel tur uisathiam lalut

58

Mizoram Police-in uisathiam a neih thar ‘Canine Squad’ member 8 chu Thawhlehni khan Home minister Lalchamliana hoin Police Headquarters Aizawlah lakluh an ni.

Uisathiam 8 an neih thar zinga pathum hi misual hnuchhui thiam an ni a. Ruihhlo (drugs) hnima chhhuichhuak thei pathum leh puakthei thil (explosives/bomb) chhui thei pakhat, mibo leh vanduai thil – in chim leh a dangte a awma mihring zawngchhuak thei (search & rescue) pakhat a ni.

Home minister chuan Mizoram tan leh Mizoram Police tan ni chhinchhiahtlak a ni, tiin, “Kum 20 liamta khan Dog Squad kan lo nei tawh thin a, thanghnih lian zet a ral hnu ah Canine Squad tha tak kan nei leh thei hi a lawmawmin Mizoram mipuite mi tithlamuangtu an nih ngei ka beisei,” a ti.

Mizoram a ralmuan rualin, hmun tinah ruihhlo kaihhnawih thilah buaina kan tawh thu te, ruk ruk leh tualthahna a awm fo thute a sawi a. Hengah hian Canine Squad hi an tangkai dawn a ni, a ti

Heng uisathiam neih nan hian sawrkar laipuiin a leina tur leh training pekna tur sum state sawrkar a pe a, a enkawl zui chu state sawrkar kut a ni. Ui enkawltu tur – handler leh asst. handler te rim taka training an neih hnu ah hlawhtling taka an hlenchhuak chu a lawmpui thu Home minister hian sawiin, an ui enkawlte hmangaih leh duat tak, an fate ang tluk hiala enkawl uluk tura chahin, an chungah Mizoram mipuite mit a fu reng dawn tih a sawi a ni.

Kum 2018-2019 khan Ministry of Home Affairs-a Narcotic Control Bureau chuan Mizoram chhunga dan loa ruihhlo tawlhruk beihletna hmanraw pakhat atan Canine Squad dinna turin cheng nuai 18.40 chu Mizoram Police hnenah a pe a.Hemi atan hian PHQ chuan tender tichhuakin, uluk takin ui note supply-tu tur hi thlan a ni. Sipai leh police hnena ui tha chi supply kawnga hming thate uluk taka thlan niin, German Shepherd Dog (GSD) 4 leh Labrador Retriever 4 lei a ni. GSD pakhat hi Rs. 50000 leh Labrador Retriever hi Rs. 40000 a lei a ni.

Ui enkawltu tur (handler leh asst. handler) hetiang lama tui mi engemaw zat atangin handler 8 leh asst. handler 8 thlanchhuah an ni a. An ni hian National Training Centre for Dogs, BSF Academy, Tekanpur Gwalior, Madhya Pradesh-ah 2019 October 7 atang khan training an tan a ni.

Misual hnuchhui thiam (tracker) te hi GSD pathum niin, kar 36 chhung training an la a; ruihhlo chhuichhuak thei turte hi GSD 1 leh Labrador 2 an ni a, kar 24 an training; puakthei thil chhuichhuak thei hi Labrador niin kae 24 bawk leh, search & rescue-a hman tur pawh Labrador niin kar 24 bawk a training a ni.

Tracker ui tih loh a dangte hi kumin March 21 khan training an zo a, tracker ho hian kumin May 16 khan an zo ve thung. Aizawl, Lunglei, Champhai leh Kolasib district-ah te dah an ni phawt anga, mamawh dan ang zelin hmun hrang hrangah hman an ni ang.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy