Daily Newspaper

Mizoram police camp chhuahsan tura tihna Mizoram-in pawm lo

15

Mizoram chhung Vairengte rama Mizoram police-in camp an siam chu chhuahsan rih turin nawrna awm mah se, Mizoram sawrkar chuan a rem loh thuin a hnial fithla a, hemi thlang thlama central armed police forces duty chhunzawm turin ramia buaina nei state pahnih chuan sawrkar laipui hriatpuinain an remti dun a. Zai inngai tawna inbiak chhunzawm zel nise, an ti.

Assam Police ten 2021 July 26-a Mizorama luta buaina an siam vanga state pahnih inkara harsatna awmte sukiang turin Union Home secretary Ajay Kumar Bhalla kaihhruaina hnuaiah Nilaini khan Mizoram chief secretary Lalnunmawia Chuaungo leh Assam chief secretary Jishnu Barua te chu New Delhi-ah an inbia a, tuna Mizoram Police awm meknaa central armed police force awmtir tura nawrna nasa tak a awm avangin inremna an neih thei lo a, hemi tlai dar 4.30 ah an indawr chhunzawm leh a ni.

Ministry of Home Affairs leh Assam chief secretary ten nasa taka Vairengte auto rickshaw stand atanga Mizoram police-te tawlhsawn turin nawr chhunzawm mah se, Mizoram chief secretary hian nasa taka hnial leh dodalin, Mizoram sawrkar leh Mizoram mipuite duhdan a nih loh thu leh an tawlhsawn chhan tur an hriat loh thu sawiin a tang a ni.

Rei tak inbiak a nih hnuah Mizoram leh Assam inrina – National Highway 306 ah central armed police forces (CAPF) duty chhunzawm turin remtih a ni a. CAPF senior officer-in a hmunah a thutchilh ang. Hei bakah hian Mizoram leh Assam sawrkar chuan CAPF duty-ten tha taka hna an thawh theihnan sawrkar laipuia Ministry of Home Affairs rawn chunga ruahmanna felfai tak siam an remti a, ramri buaina chingfel turin zai ngai tawn tak chung leh harsatna dang siam loa inbiak chhunzawm zel an remti a ni.

Chief secretary Lalnunmawia Chuaungo chuan Assam-in Mizoram kawngpui an dan chah (road blockade) bakah rel kawng an tihchhiat avanga ei leh bar lakluh kawnga harsatna kan tawh thu Union Home secretary hnenah hian thlen nghalin a rang lama chingfel turin a ngen a ni.

Mizoram chief secretary hi Mizoram DGP SBK Singh chuan tawiawmin Assam chief secretary hi an DGP in a tawiawm ve bawk a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy