Mizoram Police-in champion lawm
India ram pum huapa football-a police-te inelna 71st BN Mullik Memorial Football Championship 2022- 2023 neih zawk taka champion Mizoram Police chuan Nilaini khan 1st Bn. MAP Ground Armed Vengah ah lawmna an hmang a. Chief minister Zoramthanga leh Home minister Lalchamliama ten an hmanpui.
Chief minister chuan Mizoramin state nihna a chan tirha ramchhung mi tam takin Mizoram chungchang an hriat loh thin ngaihtuahin, tuna football leh infiamna discipline hrang hranga champion nihna kan chang fo ta chu thil lawmawm tak, Mizoram hmingthatna a ni, tiin, ram leh mipui tana Mizoram Police hnathawh leh hmalakna te a sawi a ni.
Mizoram chu thenawm ram nena ramri intawm a nih avanga dan phal loh hrang hrang tawlhluhna kawnga hman a nih thu leh, chumi doleta lo dan hna chu thil pawimawh tak, police-te pawimawhna a ni tih a sawi a. Police champion-te a lawmpui rualin damchhunga an hnathawhna leh an mimal nunah tumruhna vawng reng turin duhsakna a hlan a ni.
Home minister chuan kum 2008 hnulama sports quota-a police an lak tawh loh thu sawiin, chuti chunga India ram pum police zinga football champion a ni thei chu thil ropui tak nia a hriat thu a sawi. Police Football team hlawhltinna chu tawp mai loa, a aia thaa hma sawn zel tura duhsakna hlanin, team tha lehzual nei tur chuan infiammi mithar lakluh belh pawimawh a tih thu a sawi a. Sawrkar sum harsatna tawh karah recruitment kalphung tlem tih danglam tak behchhanin beiseina a neih thu a sawi.
Mizoram Police-ten tha taka hna thawka discipline pawh an vawn that viau rualin, police nihna nena inhmehlo tak zu leh drugs avanga buaina tawk sawi tur awm leh zauh thin chu pawi a tih thu Home minister hian a sawi a. Heng lakah hian fihlim tum turin a chah.
Force lam chu sawrkar tan sum lalut tura ngaih a nih loh laiin, Mizoram 3rd IR Bn. te Assam-a zuk awm avangin cheng vaibelchhe 73 chuang Mizoram sawrkar pek a nih thu te, hun rei tak State Bank of India tan venhimna an pek man tlingkhawm vaibelchhe 8 chuang sawrkar pek a nih thu te a sawi bawk.
71st BN Mullik Memorial All India Police Football Championship 2022- 2023 hi kumin March 11-21 chhung khan Sri Nagar-ah neih a ni a. He tournament hi All India Police Sports Control Board buatsaih thin a ni. Tunhma in Mizoram Police hian kum 1993 (Aizawl), 1996 (Shillong) leh 2012 (Patna) ah te pathumna dinhmun an lo hauh tawh a ni.
Kumin hian team 34 chhuakin, Mizoram Police hian March 13 khan an match hmasa berah Gujarat Police 9-1 in an hneh a, March 15-ah match hnihna Jharkhand Police 5-1 a hnehin, March 16 khan Madhya Pradesh Police 6-0, March 17-ah Assam Police 2-0, March 18-ah BSF 2-1 in an hneh a ni. Semi final-ah Punjab Police 2-1 in an hneh a, final-ah 1-0 in Assam Rifles an hneh a ni. Mizoram Police goalkeeper Const. F. Lalmuanawma chu Best Goalkeeper-a thlan a ni.
Mizoram Police-in champion lawm
![](https://theaizawlpost.org/wp-content/uploads/2023/03/pol-1024x682.jpg)