Daily Newspaper

Mizoram police-in Kolasib SP kahchilh

Home Minister-in Vairengte-a Mizoram police camp a tlawh

177

Aizawl, July 28 : Mizoram Police awmna camp chu Assam Police-in hnehchhuhin an luah a, chumi avanga Assam police hotute leh Kolasib SP te an inbiak lai mekin Assam police atangin Mizoram police leh civil mi lam hawia silai hmehpuah a nih avangin Mizoram police chuan an chhanglet lo thei ta lo a, Kolasib SP pawh chu an kah chilh hmiah.

Vairengte dai Mizoram chhunga Mizoram Police camp, July 26 chawhma lama Assam Police-in hnehchhuha an luahsak avanga buaina awmna chu July 27 khan The Aizawl Post chuan a tlawh a.

He camp hnehchhuh a nih avang hian Mizoram police bakah Vairengte khaw mi thenkhat chu camp-ah hian an kal a, Vairengte khaw mite leh Assam police hi an innawr deuh hnuah Mizoram police leh Assam police hi an innawr ve leh nghe nghe nia sawi a ni.

Hetih lai hian Kolasib district SP leh a naute chu Assam police-in an hnehchhuh tak Mizoram police camp-ah hian boruak tha a awm theih dan zawngin Assam police hotute nen an inbia a.

Inchhung lama an inbiak lai mek hian pawn lamah an lo innawr ve reng bawk a. Assam police hian civil mi leh Mizoram police awmna lamah tear gas an kah bakah smoke grenade an vawm a, mipui hi an tlanchhiat mai loh avangin silai an hmetpuak zui ta niin a hmuna awm civil mi leh police lam chuan an sawi.

Hetia Assam police lamin silai an hmehpuah takah hian civil mi leh Mizoram police awm hnai deuh chu hmun him lamah insasengin Mizoram Police hian ‘position’ an la ve nghal a, silai hi an chhanglet zui ve ta mai tih an sawi.

He camp chhunga awm mek Kolasib District SP Vanlalfaka Ralte pawh chu hrechang tawh loin Assam police silaimu chu silaimu vekin an chhanglet a, Kolasib SP pawh chu bawkkhup chungin a naute ho nen hmun him lam pan tumin a thlang kham sang vak loah an relhru chhuak nia sawi a ni.

The Aizawl Post thudawn danin, Kolasib SP hi a naute nen he camp thlanga CRPF camp lamah tawlh thlak an tum a, CRPF lam hian luh an lo remti lo a, engtin tin emaw hmun dangah insasengin thi loa ruangin an chhuak hram nia hriat a ni.

“Kan SP pawh a (camp) chhunga a la awm reng laia kan chhanglet ve lo thei ta lo kha, Mizoram police hi silai hmetpuak hmasatu kan nih lohzia a tichiang viau a ni, ” thudawnna chuan a ti.

Mizoram Home minister Lalchamliana leh minister dangte chuan Thawhlehni khan Vairengte daia Mizoram police camp hi an tlawh a, hetah hian CRPF hotuten lo dawngsawngin, Mizoram Police inspector general John Neihlaia chuan CRPF commander chu inkahna a thlen laia a (Kolasib) SP lo hum tum loa an camp-a an luhtir phal lo hi hmaichhanah a chhuahchhal.

CRPF commander chuan he thil hi a hriat tawh thu leh thil awmdan chiang zawka an chhui zui tur thu sawiin, an naute zingah thil tisual an awm chuan hma an la dawn tih a sawi.

Mizoram Home minister bakah minister Robert Romawia Royte chuan, central-in ramria buaina awma ban phar tur leh thu lai tak la chunga hma la tura a rawn dah CRPF ten an camp chhak, Mizoram chhunga awm Mizoram police camp an rawn luah luihna tura kaltlangtir an phal mai chu an hriatthiam theih loh thu an hrilh a. “Nakin zelah pawh kan ring zo dawn tawh che u em ni,” tiin an chhuahchhal.

Helai hmuna thuthar thehdarhtuten an kawmnaah Home minister Lalchamliana chuan, inkah an hreh em avanga inrem dan kawng an zawn hram hram laiin Assam police lamin tharum nena Mizoram police camp an hnehchhuh leh, silai kap puak hmasa zawka Assam police an tang chu pawi a tih thu leh, nunna hial chan an awm chu pawi a tih thu a sawi a. Mizoram chhungah Assam lam chu hleihluak takin an rawn che tih a sawi a ni.

Home Minister hi minister dang K.Lalrinliana, Lalchhandama Ralte, Lalruatkima, Robert Romawia Royte leh MLA te Lalrinsanga Ralte, Er.H.Lalzirliana, C. Lalmuanpuia ten an tawiawm a, John Neihlaia, IGP leh Police Department-a hotu dangte an tel bawk a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy