Daily Newspaper

MIZORAM POLITICIAN-TE’N PU DUHAWMA AN TLUK LOHNA

13

-Dr. C. Lalrampana

MNF MLA-te’n Mizoram Assembly Speaker hnena Pu Lalduhawma chungchanga lehkha an thehluh chungchangah sawi tur ka nei ve lo. Tute paw’n zalenna an nei, na tak tak paw’n lo inbeitawn vel ang hmiang! Politician an ni miau alawm. USA President inthlan campaign neih lai mekte phei khu chu an rapthlak hlawm hle; ringtu nun a lang vak lo khawp mai. Kan ram zimteah phei hi chuan an la indimtawn phian zawk niin a lang. Mahse, a lan dan ang erawh kan ni vek lem lo thung. ‘Hriatna pawnlang thinlung chhung sual si’ kan nih hmel.

April 6, 1946 Mizo Union a din atang khan tun thlengin kum 74 zet Mizo mipuite’n politic kan hmel hriat ve ta. Political Party ding hmasa ber Mizo Union Party-a President hmasa ber chu Pu Pachhunga (L) Aizawl Bara Bazar sumdawng pahausa kha a ni. Kum 74 zet kan hman liam mek tawh karah khan Mizo politician fel tak tak leh tha tak tak mi engemawzat kan hrawn tawh a; chung zingah chuan Pu Lalduhawma ang ve tak nia ngaih theih chu Pu J. Thanghuama (L) ex-Speaker kha a ni a. Pu Denga Ministry-ah march 10.1987-Jan 29.1989 thleng khan speaker hna a chelh a ni. Pu J. Thanghuama(L) pawh kha Opposition bench-a a thut chhung zawng khan Ruling party kha a chhaih buai hneh thei ve hle a, thil a hre rei theiin a chhinchhiah tha thei hle tih a hriat theih. Ani kher lo pawh kha fel tak tak, fing tak tak, thiamna tha tak tak nei sawi tur tam tak an awm ang, sawi vek sen a ni lo.

Kum 1984 atang khan Pu Lalduhawma hi politic field-ah a lo zuang lut ve tan a. Kum 36 zet politic-ah tawn hriat a nei mek tihna a ni. Hetih lai hian ani aia politic field-a tawnhriat ngah leh zei tak tak, kum 50-70 lai politic lipuia lo liluh tawhte pawh sawi tur tam tak an awm ang. Mahse, Mizo politician-te hian Pu Lalduhawma tluk lohna lai hotê an nei a, chu chu an tih ve chuan awlsamtea Pu Duha tluk ve theih mai a ni a; chu an tluklohna lai tak chu tarlan ka tum chu a ni. Heti taka Pu Lalduhawma Ruling party/ministry apiangin an beih vak zelna chhan hi a lanfiah theih nan Pu Lalduhawma nihna tlem tarlang ila.

Pu Lalduhawma S/o Vaisanga (L) hi Feb. 22, 1947-ah lo piangin a nupui hming chu Liansailovi a ni. Fapa 2 neiin chawlhhmun Aizawla khawsa an ni. Huan siam hi a tui zãwng niin lehkha a chhiar hnem a, article ziah pawh a peihin a tui hle. Thiamna lamah chuan BA (distn) a ni. kum 1972 atanga 1977 chhung khan Principal Assistant to the Chief Minister a chelh a. Kum 1977 khan Indian Police Service a zawm a. Kum 1984 khan Indian National Congress party zawmin Vice Chairman of Mizoram State Planning Board a ni a, hemi kum vek hian INC Party ticket-in MP -a thlan tlin a ni. A hnuah MNU a din a, a hnu lawkah Mizoram People’s Conference nen an inchhunfin a; chutah chuan working president a ni zui. A hnu lawkah Mizo National Front zawmin Advisor a ni leh a, MNF an keh khan amah zuitute nen ZNP an din a. 2018 MLA General Election-ah party hrang hrang inzawmkhawmin ZPM-ah thawkhovin MLA a ni mek.

India ram baka khawvel hmun dang a fan tawhte chu -Myanmar, Russia, Mongolia, USA, France, UK, Switzerland, Netherland, Jamaica, Estonia-te a ni.

A zuan lawrna anga lang leh IPS; MP; Party Founder, Advisor, Planning Board Vice Chairman etc. a nihna ropui tak tak emaw foreign countries a fan zau lam khi ka tarlan tum a la ni chuang lo.

Mizo politician tam berin Pu Lalduhawma an tluklohna hote leh amaha awm, quality an lak chhãwn tur hotê, amah tluka personality tha leh effective, efficient an nih theihna tur taimakna, dilchhutna, thil chik leh history chhui kawngah leh hriat reng tul chi chhinchhiah emaw, relevant document vawn thatah an tluk lo hle niin a ngaih theih.

Kum 2003-a MLA a nih lai leh kumin 2020 8th Assembly Session-a a thusawite leh public platform leh Tv interview, press conference leh press statement, hun tawn lai, hun kal tawh, hun lo la kal tur etc. reng rengah Pu Lalduhawma tluka thil chik peih, dilchhut peih, hrechiang, chhinchhiah peih leh information rintlak fawm khawm peih kan politician-ho zingah an vang hle niin a lang. Thiamna lamah chuan Pu Lalduhawma hi MA/ Ph.D a ni lem lo, BA (distn) a ni ve mai. Kan politician-ho zingah amah aia Educational Qualification sang tak tak nei an tam mai thei. Mahse, Pu Lalduhawma an tluk lohna lai point-ah hi chuan an khan lo deuh niin a lang. Ani hian kawng engkim hi a finfiahin a chhut peih a, dan leh hrai (act) hrang hrang a zirin a belchiang peih a; hetiang taka a beih thinna leh thil a chik peih avang hian sorkar fawng vuantute dai pelh leh tihfuh loh te, an hmaih palhte a hmuh chat chat thin avang leh a hun takah a chachhuah chat chat thin avang te, a hun leh hmuna a tuang a tihchhah thiam thin avangin Sorkar chelhtu apiang tan hnawksak leh ngaimawh a hlawh mai mai niin a lang. Amaha awm taihmakna, thil chik peihna, finfiahna, thil chhinchhiah leh document vawn that peihna quality hi chin thanah nei turin tih tak takna nen kan politician-ho hian bei ve theuh se, Pu Duhawma ang vek hi an ni thei. Mahse, chutiang an ni lem lova, mahni bial mipui dinhmun leh sorkar kalphung pawh hrechiang lo, mahni State budget zat, House-a mahni bill put luh leh GDP pawh hre chiangkuang mang lo hi a tam zawk an nih hmel hle.

Chuvangin, tun tuma Pu Lalduhawma ngaimawhna lo awm nia lang leh Assembly House-ah thu ve tawh rih lo se tih duhna thinlung a rorelpuite atanga lo irh chhuak ta nia lang thei pawh hi a thil chhut peih leh chhinchhiah that peih rah chhuah mai niin a lang. Amah ang tak hian kan roreltute hian rilru seng tak tak peih theuh se Pu Lalduhawma hi an tluk vek mai dawn a lo ni reng mai.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy