Jail thawmthatna tur sum awm nia lang si, a taka Mizoram sawrkarin hma a lak loh chhan chu Gauhati High Court-in a zawt.Kum 2022 khan Zofa Welfare Organisation chuan Gauhati High Court-ah public interest litigation (PIL) thehlutin, Mizorama jail dinhmun leh hmunhma siamthat a tul thu hi an thlen a; hemi thu kal zelah kumin September 5 khan Mizoram Home secretary-in state sawrkar aiawha a chhannaah Mizorama jail 8 chu thawmthat tuma ruahman mek niin, hemi atana senso ngai zat chhutin detailed project report siam a ni anga, administrative approval leh expenditure sanction lak fel a nih hnu ah thawmthat tum a ni tih court hi a hrilh a ni.
High Court hian kumin September 6 khan Gauhati High Court chief justice Vijay Bishnoy leh justice Michael Zothamkhuma te bench-ah ngaihtuah niin, jail dinhmun siamthatna tur hi sawrkar laipui atangin state sawrkarin a hmu thin nachungin, lehkhaa tih tum dan ruahman bakh chu tihchangtlun tumin a taka hma lak a ni ngai lo nia a lan thu a sawi a ni.
Mizoram sawrkarin jail thawmthatna tura ruahmanna a siam mek chu a taka a rang lama tihpuitlin theih ngei a duh tih High Court hian sawiin, state sawrkar chu hemi atana a taka hma a lak dan tur leh a zawh hun tur chu a ni nen lam hrilhchiang turin kar 4 chhung a nghak dawn tih a sawi a ni.
Hetihlai hian Gauhati High Court hian Zofa Welfare Organisation PIL thehluh thio bawhzuiin, Human Rights Act of 1993-in a phut angin Supreme Court rorelna awm tawh changchawiin, Mizoram sawrkar chu hriattir a nih atanga thla hnih chhunga State Human Rights Commission (SHRC) din turin a ti a. A tihpuitlin loh chuan court zah lohna lian takah a ngai dawn tih a sawi a ni.
8 Tun dinhmunah Central Jail, Women Central Jail, District Jail Aizawl, District Jail Lunglei leh District Jail Champhai chu a awm thei zat tur bituk sa aia tam tang an awm mekna a ni.
8 2024 September 9-a chhinchhiah danin, Mizorama jail 10-ah hian tang awm thei tur ruahman chu mi 1386 a nih laiin tang 1791 an awm a; heng zinga 1556 chu mipa niin hmeichhia 221 an awm a, hmeichhiaten an fa pawm lai an tan pui naupang 14 an awm ve bawk a, naupangte hi ‘tang mek’ belhkhawmnaah chhiar tel thin an ni.
8 Tang mek 1791 zinga 57 hi chu damchhung tang tura court-in an chungthu a rel fel tawh an ni a, midang 584 hi court-in thiam loh a chantir tawh, an tan hun tur tlak mek niin, a bak 1136 hi an chungthu court-in a ngaihtuah mek an ni.