Daily Newspaper

Mizoram: State hring tha ber

12

Tunhnai khan magazine lar tak Travel & Leisure India & South Asia chuan India ram pum huapa survey an neihnaah ramngaw hring thatna berah Mizoram an thlang a, Best Green State-ah an puang, tiin Mizoram sawrkar thuchhuahah tarlan a ni a.

He award avang hian social media (page) lamah pawh Mizoram Tourism hian tlawhtu a ngah phah hle, tiin thuchhuahah chuan tarlan a ni a. Best Green State-a Mizoram an thlan nachhan hi ram hring mawi tak mai a nih piah lamah tourism department-in tunhnaia “Responsible Tourism Policy” a chhuah vang a ni, tia tarlan a ni bawk a.

“Responsible Tourism Policy tharah hian tunhmaa la awm ngai lo, khualzinmite tlawh fo thin hmunhma vawn thianghlim te, ramngaw, thing leh mau chereu tur ven te, ramngaw tichhe thei tur ram dang atanga thing leh mau lam chi lakluh khap te bakah Mizoram pawna nauban lakchhuah khap te leh thildang tam tak a tel a. He Policy hnuaiah hian zin mite intiamkamnain a ken tel, ram humhalh tur leh vawngfai tura khualzinte hnena ngenna a chhawpchhuah vangte pawh a ni tel bawk,” tiin thuchhuahah chuan tarlan a ni bawk.

Mizoram zau zawng 90% deuhthaw hi ram hringin a khuh niin chhutmiten an sawi thin a. Mizorama kuthnathawka eizawng zaa 70 deuhthaw hi thingtlang lo nei an ni a. Thingtlang loneih dan chu kan hre vek a, ramngaw kan thiat a, kan hal a, a kum lehah chutiang bawk chuan kan ti leh a. Thingtlang lo neihna hlui (chul ram) te hi kum tam tak hnuah lo chuan loneihna atan hman nawn a ni leh lem lo. Hetianga kan ram kan suasam reng chung pawh hian, India rama ram hring tha ber kan la ni thei cheu hi a ropui hle a, Siamtu hian malsawmnaa min vur dan hi tun thleng hian kan la varpawh lo va. Kan thanharh theih nan midang daihin “Best Green State” tih min rawn hrilh te hi kan ngai ta hial niin a lang. Kum tina ramngaw thiata lo neiha eizawnna hi alo berah 50% tal pawhin kiam thei phei sela chuan, thildang vang pawh ni lovin, Mizoram boruak oxygen thianghlim hip tur ringawt pawhin khualzinmite hi an lo lut ruih ruih rengin a rinawm.

Hetih lai hian, tourism lama thahnemngaihna pawh a lo lang nghal a. Hetia midangin ‘in hring tha ber e’ min han tih takah hi chuan, ‘kan chutih khatih vang’ tia hmingthat lak tumna anga ngaih theih thu leh hla a lo ri chhuak erawh, belhchian a dawl meuh em tih ngaihtuah theih tak a ni awm e. Mizoram Responsible Tourism Policy 2020 duan thar hi a tha em em, mahse ‘Best Green State’ nihna chhan pakhata sengluh tum hi chu a la hma deuh lua niin a lang. ‘Mahni infak leh sakhi nghalah engmah a bet lo…’ tih te hi kan ang reu reu ang e.

Eng pawh ni se, ‘hring’ chunga khualzinmite hip luh kan tum tak tak a nih chuan, a bulthut ber chu, thingtlang lo neih hmanga “kum tin ramngaw thiah” kiamtir zel hi tourist hipna tur chu lo ni zawkin a lang.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy