Mizoram Super League (MSL) XI a hnai!
League thar a piang dawn em ni?
Kum 1994 bawr vel khan Zarkawt tlangvalho te chu Pu Thanglianchhunga (P&Sons) te in kawtah, Basketball Half Court pawh tiat lo ah khan an inkhel thin a – anni thianho inthurual chuan Kum 1995, June ni 6 khan Zarkawt Falcons basketball club an din! He club hi Mizorama mumal taka basketball club piang hmasa ber a ni a, Mizoram Basketball Association (MBBA) pian hnu kum 9-ah Mizoramah hian awmze neiin basketball club a ding chauh tihna a ni.
Zarkawt Falcons hian an din tirh phat atangin court an sual nghal a, an hmalakna chhinchhiahtlak em em bawk chu ‘tualchhunga basketball boruak alh a inhlap len zual theih nana tournament’ an buatsaih a, club thar a piang zui nghal zawih zawih.
Tichuan…
Thumal pakhat ‘changtlung’ tih leh Mizoram basketball hi kalkawpin a thang chho zel a, MBBA leh Zonet thawhdunna zarah kum 2015 khan Mizoram Super League (MSL) duangchhuakin, he an thawhdunna hlawhtlinna hian Mizoram mai ni lovin India ram a nghawr pha hial!
Phek hmasa lama MSL chanchin ngaihnawm erawh MSL X a zawh rualin phun thawm a ring tan a, inkhel in hlut a hlawh lo chho zel bawk nen, a hmuna inkhel thlirtu an tlahniam lutuk chu mawhphurtu ah MBBA leh Zonet in kawh rawn a tawk!
Anni pahnih thawhdunna duhkhawp lo pawl leh senso tam lutuk hahthlak ti tualchhung basketball lovers an pung tual tual! Indemna leh Mizorama basketball than dan hi a piangsual tipawl an tam zui hle bawk – chung zingah chuan tualchhung basketball inrelbawlna helh zinga mi, Mizorama kan top basketball club te pawhin ngawih har an ti ta tlat! Senso a tam, hmasawnna a tlem tih hi chhut tham a ni ta.
League thar rim a nam!
Mizoram basketball chanchin hmasa lama club tan senso beitham tak ang kha a ni ta lo va, lakluh aia tam lawrlak senso a nih tak avangin club khelhna league a san ang zelin sum luangchhuak a tam tial tial a, Mizoram basketball hmalam a thim ta fu – thim a chhah poh leh eng a zual theihna turin senso a sang ta sa sa, league thar sawi mawi an awm tan a, MBBA atanga in dan mai duh thawm te lungawi lo ri ser ser chu tualchhung basketball inrelbawlna ngaihven tan haider theih a ni lo!
Hello, Pu MBBA!
MBBA inrelbawlna hi mahni lakluh aia sang fe a khawsa tlat khawpui nula zan lam ngam ang mai a nih theihna lai a awm! Hetiang a nih theihna tur hian a tha ber leh awlsam ber, kan neih aia tam hman chhuah hi kalphung a nih tak tlat vang a ni – hemi ah hian sum sengtu te ngaihchan an nih tawk loh vang leh, sum seng tam club inlungrual loh vang a ni!
Calendar thla 11 khat tan mai MBBA in a nei a, kum khat chhunga a chetvelna leh Mizoram sorkar atanga promotional fund cheng nuai 8 vel hmanga inchinfel hi MBBA lam tan hian a har a, a enkawl a fate (club) lamin beisei an nei a sang bawk si nen – a lainatawm riau he pawl hi!
Thapui chhuahin tan a la a, khawsak tihawlsam nan sum a dap a, nuai 13 chuang tun season ringawtah pawh sum a thawkchhuak; mahse, enkawl a ngah em a, chet a harsat thung!
Boruak pui tak siam a, ennawm leh thlir rawn tham buatsaih tur hian a hautak lo zawnga insiam rem a, a enkawl club-te nena inrawnkhawmna tam zawk neih a, MSL a nih tawh phawt chuan inter state palyer man to nghal zawtte tel lo zawnga inhher rem te a ngaiin a rinawm.
Club calendar hi thla 4 emaw vel lek buatsaih se, a bak inter school leh tourney a buatsaih thin te nen hian a hrang hlakin kal ta se – club senso hi a kiam duak ngei ang!
Pa ber MBBA tel lohna pawl hran leh league hran erawh piang lul lo se; chutih rualin, sum chhuak tam lo zawngin MBBA hian ngaihtuahna mai ni lovin, bawhzui nghal theih ruahmanna thar duang chhuak se – Mizoram basketball hi thuang hnihin phel darh ni ngai suh se!
Hoops Mania Timeout
Vawiin February ni 12 hian MBBA chuan mo a nei dawn. Christopher Lalawmpuia Pachuau (Technical Committee Secretary) leh Dr. Catherine Lalnuntluangi te chuan dan khatna in Dawrpui Presbyterian biak in ah an inkutsuih dawn a, nupa kawpchawi rem tak ni zui turin The Aizawl Post Hoops Mania chuan duhsakna kan hlan e.
Mizoram Super League (MSL) XI a hnai! League thar a piang dawn em ni?
