Mipuiin R. Dengthuama Hall lam an pan dul dul a; MSL Season 9 hmawr bawkin a awm chho mek. Semi-final khelh mekah hian game 3 khelh turah game 2 chak zawk zawkin final an lut ang.
Zarkawt BCA-in coaching staff siksawi hlawk mah se team tha leh ngialnghet an nih an la chhawm nung zel.
Champhai coach Puitea Zadengin a tualchhung player rualte hmangtangkaiin semi-final game 1-ah Zarkawt BCA, Marc Tetea Sailo kaihhruai hi an lehthal teuh hle!
Semi-final lehlamah Bungkawn LB chuan player hming langsar fal kawl lo mah se an NIS coach KC Maliana hian tualchhung player kaihhruai a thiamna phochhuakin Khatla TBL hi round hmasa lamah a team-te a lo hnehpui tawh a, anni pahnih inkhel tur hi mipuite mit fukna a ni dawn chiang.
Khatla TBL erawh champion nomawiin a zui emaw tih tur, an coach Mission veng tlangval Ahruaia’n MSL season hnuhnung bera a champion-pui player tha rual hi MSL trophy lakpui lova MSL zin kawng zawh hi a tum hauh lovang – inkhel nghahhlelhawm MSL Semi Final kan chuang kai leh ta e.
MSL semi-final hi Zonet zar zovin a tam zawk a hmuna kal thei lote’n an technology chhawpchhuah thar ber berte hmangin mahni in lumah kan lo chhim leh thei dawn a – cheng nuai tam fe senna, American mi dum palian, Indian player tha bik, tualchhung Mizo player thate atanga Salem veng YMA member (security) tlawmngai mihringte thleng inrawlhna, MSL zet chu hei a pui leh ta miah miah hle!
Hei le, MBBA lamin Season 9-na min chuankaipui mek a, association lian ni lo mah se Mizo thalaite hmakhua ngaia an hnathawh hi a chhuanawm hle. MBBA hian zirna hlamchhiah lovin, a chawisang zawngin basketball awmze nei zawka buaipui nachang a hria te hi fak zui tlak a ni.
Mizo tleirawlte khelh chak, high school leh higher school inelna bakah MZU hnuaia Inter College lama basketball hmanga inelna ngaihhlut em em lah hi zirlaite pual a nih angin, zirlai tan lo chuan inrawlh a rem lo. Zirna in nena inhne rem zawngin kum bithliah duang zaihin MBBA hian hma lakna lian a nei chhunzawm zel hi entawntlak thil tha a ni.
Thlirlet zuai ila…
Mizo thalai sam put dan hmel hmang (hair style) thlaksak hlawk theitu chu khawthlang mi lar (western celeb)-te hi an ni fo. Aizawl thalai, kum 1990 bawr chho vela lukawlh tula siamtu pawh kha Chicago Bulls vanglaia an superstar Michael Jordan kha a ni chiang!
Chuti ang karah chuan Mizoram basketball inpui tia chhal ngam, Zarkawt venga Babutlangah basketball court a awm a, veng neitu hawihhawmna leh thilphalna avangin Aizawl thalai veng hrang hranga mite fuankhawmin, basketball an han khel chho ta tak tak mai chu – sawiseltu lamin Mizo bawp tawi tan khukpui hluai chi a ni lo ti pawl an awm nang a; khawpui thalaite erawh Goliatha tiat ni lo mah se ngaihdan hran an nei a, basketball atchilh miau hek le – tuna Millennium Center sir, traffic point chhak deuha Zarkawt rawlthar, Renga Sailo (Reng Hill/Pakhangba Tailor) siam court te reuh te ahte khan inkhel peih an awm nileng thin maw le!
Aizawl veng hrang hrangah basketball khel an pung zel a, mumal zawkin club din chhoh a ni chhunzawm a – Falcons, Serpens, Club Francis, JL Vision bakah thalaite hmakhua ngai club mumal zawkin an rawn inlar zel a; kha tih lai, kum 1990 chho khan khawpui thalai tam tak proxyvon hmang sual kha pung thar hluai mah se kawng dik kawhhmuhtu, Zarkawt Babutlanga basketball khel zinga mipui hipkhawmtu zingah Falcons player tha fal Msa leh Engkimate bakah khan boruak nei alh phat kha an kat nawk.
Anni hnu deuha phai lama lehkha zir zo/chawlh hmang zingah thalaite huikhawm thiam bik riau, Uncle Dara leh a thiante’n thawm an rawn nei zui hak a; national team lama H. Laldinsanga (Mapuia) inlan nawlhte chuan awmze nei zawkin tualchhungah basketball inelna a nghawr chhuak dur a!
Veng/khua inelna lamah Chanmari Rempuia’n dam dupa score mial mialin, an veng trophy a lakpui chho a; ball khalh leh siksawi thiam bik KC Maliana leh Saron Kima che vel chhehvel hmuhnawm zia te; Tuikual South vul vanglai taka Albert-a, Dina leh an phir sam sei unau (Kolasib-ah anni unau kha an tui chhekkhawlna ah an tla hlum! Mizoram basketball khawvel kha a ngui tak zet, an boral tum khan!)-te hoin game rang tak leh an tharum ngah an hlawhtlinpui tlat te; Zarkawt vengin game dam dup an phohchhuah thiam zia leh Kanan val palian Liama ball shooting dak thlarh te; Champhai vengthlang player dawng nguah rual rawn invawrh thut tuma Shillong aiawh, Madanriting Mafinga leh Mapuiate unau mipuiin an lawm thinzia piaha tarlan tur kuh tulte kha a lo rei ve deuh ta…
MBBA lamin changtlung zawka MSL a chhawpchhuah meuh chuan chuai thei lo – Michael F meuh paw’n an vanglai an ngai ve ta ngawt ang.
Players hmuhnawm fal nalh, a inkhel en tura district dang atanga pan tham – Lalrina Renthlei bakah |hazuala leh Rozamate’n mipui mit an titlai chhunzawm zel – hming thurchhuah sen loh an awm ta nawk e – hmasawnna!
Club hloh thalaite hlawkna
MSL season 8 kalta chhunga tum 4 zet champion a, record nei tha ber Zarkawt BCA club neitu (owner) Pu Msa thusawi hi a ngaihnawmin Mizo basketball hlimthla a lang fiah hle:
“Kum 2010 khan ka pa Biakchunga boral ta nghilh lohna’n BCA (Biakchunga) basketball club hi ka’n din chho rawih a; kei hi basketball player lo ni ve tawh thinin, Zarkawt Falcons lama ka team-mate-te nena kan hun lai ngaihtuah chuan tuna kan nau, player tha rual seng sawngte thlen chin hi a thui tawh hle. An tuihalna chhawkzangkhai a, vawiina an thlen chin hi chuangkai thei tura thahrui thawhtu zinga ka tel ve thei hi ka lawm tak zet; tin, hlawh mumal tak player kan pek hian nghawng a neih chu India rama basketball inelna huangah Zofate hming a thang mawiin, North East India-ah phei chuan hei, kan champion zui ta mawlh mawlh mai!
“Tualchhung atanga kan hmalakna rah kal zel kha tunah chuan India hriat kan hlawh ta… Club lam hian a sum ang chuan hloh deuh mah ila, Mizoram tan hlawkna hi club neitu (owner) dangte hmathlir a nih vek ka ring.
MBBA puipa thlirna
Mizoram Basketball Association puipa lama general secretary, a vanglaia basketball player inthazo veh vawh thin Pu Zomuanpuia chuan, “MSL buatsaih tur hian senso a ngai hnem hle a, club neitute chungah MBBA hmingin lawmthu ka sawi takzet. Foreign player leh Indian player tha bikte’n MSL an rawn khel hi tualchhung player lamin an hlawkpuizia chu Mizoram aiawha tunhnaia chhuak, kan senior mens team hlawhtlinna hi en ila a chiang mai awm e.
“Tin, MSL mipuiin kan hlut zual zel a – MBBA lama ka thawhpuite inpekna, zanriah mahni inah pawh kil hman lo, inkhel zawh tawh hnu zanrei thlenga R. Dengthuama hall lama duty buai thinte zarah inelna ngaihhlut hlawh tak MBBA-in kan la chhawpchhuak thei hi tarlan hmaih a thiang lo awm e.
“Zonet kan thawhpui thei hi a rah kan seng zel a; tin, tualchhung basketball player hmasawnna hian hma lam pan zel turin MBBA chu a cho phur tak zet bawk.
“Referee an tangin hmasawnna kan hmu zel a – mipui hlut MSL hi hruaitu hmasate kawng lo sial hlawkna Mizo basketball ngainatute’n kan tel hi kan vannei ngawt mai. MSL a hmun ngeia rawn en vek turin mipuite ka sawm a che u,” tiin.
Mizoram tan…
Mizo hnam hi tam teh tluarh lo mah ila khawvel mit hmuhah erawh chhuan tham leh tlak kan nihzia te, thalaite hma ngaia a tha zawnga nawrtu leh fuihtute zingah infiamna huanga mi hriat hlawh lem lo, thahrui leh sum tam tak seng hi Zofate zingah an awm tawh a, an la awm zui zel bawk.
Kan chak loh leh tlin lohna hmanga kan indiriam tawnna hian rah tha a chhuah hriat tur a tlem pharh.
|henkhat tan chuan basketball Mizo zinga lo buaipui ve chiam hi atthlak ti pawh an kat nuk ta ve ang. Thuk zawk thlir erawh chuan thangtharte an lianin an sang tawlh tawlh a, anni ho hian an pumrua mil zawng tak mai hmangin Mizoram an tihmingtha nawn awn awn mek chu a nih hi!
‘Nang i awmna hmunah, kei ka hmunah’ tih thupui nen Zofate chim chin mawitu ni zel ang aw…
Mizoram Super League (MSL) Zin Kawng Tpa Bunghai
