Mizoram taekwondo team kutah medal 3

Mizoram taekwondo team kutah medal 3
October ni 18-20, 2024 chhunga Pondichery-a khelh zawh tak 40th National Senior Kyorugi & Poomsae Taekwondo championship-ah Mizoram taekwondo team chuan gold medal pakhat leh bronze pahnih an hlawhchhuak.
Mizoram team medal lakna hi Poomsae inelna huangah niin, gold medal hi under 30 male team category-ah a ni a; under 30 female team leh under 30 male individual category-ah bronze medal an la bawk.
Gold medal latu male team player-te hi H. Vanlalfela, Lalthlamuanpuia leh Daniel Lalhumthangate an ni a; state /central service aiawh 29-te nen round tinah Poomsae pahnih \heuh hmangin an inel a ni.
Mipa lam intihsiakah hian kum nga chhung teh meuha team \ha ber innihchhawk zak zak Mizoram leh SSCB(Services)-te chu mipui mit fukna ber an ni leh chat.
Quarter-final lamah mi 29 tlingin, semi-final team 16 thlan an ni leh a; final round atan mi pariat thlanchhuah leh niin, mi pariat intihsiak leh a\angin rin lawk ang ngeiin Mizoram leh Services bawk an fal chho leh a ni.
National senior champion ni lai leh National Games gold medalist ni bawk Mizoram chuan point 6.450 hmuin hneh takin point 6.112 hmutu Services an awp zui a, a zawnin an champion ta a ni.
Mizoram team player pahnih Lalthlamuanpui leh H. Vanlalfelate hi November thlaa khelh tur World Championship-a India aiawh turin India camp zawm tura koh nghal an ni.
Bronze lakna pakhat zawk women team-ah Doris Lalhmangaihzuali, J. Zothanzuali leh Vanlalhmangaihzualite \anghoin final thlenna’n quarter 20-na niin, semi-final lamah palinaah an invawrh chho a, final round-ah pathumna luah lehin bronze medal an la ta a ni.
Bronze medal lakna dang hi Lalthlamuanpuia’n individual male poomsae inelna a\anga a lak niin, quarter-final a\angin Services leh Maharastra-te chu final round thlengin a lehthal zo ta lo a, point inhnaih takin Thlamuanpuia (point 6.21) hian Service (6.23) leh Maharastra (6.12) aiawh a pha ta lo a, bronze medal a lungawipui mai a ngai ta a ni.
Mizoram aiawh hian player 15 leh official pali an fehchhuak a; kumthar January thlaa Uttarakhand thlen tur 39th National Games mens team, womens team, men individual leh kyorugi under 87kg khel turin an qualify nghal a ni.
Mizoram team hi coach Lalinpuia (Armed Veng South) leh R. Lalchhandama (Mission Vengthlang)-te’n an hruai a; technical official pahnih Joseph Thansanga (Electric Veng) leh Robert Laltluangkima (New Serchhip) an kal ve bawk.