Mizoram tan zu zawrh mai a tul
– PC president
State sawrkarin sum lama harsatna a tawh zel lohna atan Mizoram tan zu zawrh a tul nia a lan thu PC president Vanlalruata chuan a sawi.
Nilainia kumin atana an party office kharnaah PC president chuan, kumin state budget-ah 17.47% chiah hmasawnna hnathawhna a ni a, hetiang vel hi kan dinhmun a ni kumtin reng a. Hetiang a nih lai hian sawrkar hnathawk hlawh leh hamthatna atan 47.06% hman a ni tih a sawi.
Sawrkar laipui chuan a hnuaia thawkte hlawh pun tumin hma a la mek, tiin, “Hlawh pun dan tur la tihfel a nih loh laiin, a nihphung tur a lang ruak tawh. Tuna a lan danah sawrkar hnathawk hlawh hi a let 2.46 velin a sang dawn niin a lang a. Hetiang hian a kal tak tak a nih chuan kan state budget-in sawrkar hnathawk hlawh a daih dawn lo,” a ti.
Kumin state budget atanga enin, sawrkar hnathawk hlawh chu 30.81% a ni a, pension hlawh (hamthatna) 14.95% niin, hemi belhkhawm hi 45.77% a ni a. He 45.77% hi a let 2.46-a a pung a nih chuan 112.59% a ni tihna niin, budget pumpui aiin a tam dawn tihna a ni tih Vanlalruata hian a sawi.
“Hetiang taka sum dinhmun chhia hi siamthat a nih theihnan sawrkar ruhrel siamthata suihtet ngei ngei a ngai a; sum tam zawk sawrkarin a neih theihnan leh zu chhe lutuk in avanga nunna tam tak kan chan reng tihtawpna atan awmze neia zu siam leh zawrh mai a tulin a lang,” a ti.
Mizoram tan zu zawrh mai a tul – PC president
