Nimina STAM inkhawmpui hmanpuitu Education Consultant Rev Dr K.Thanzauva chuan kan ram zirna hi kan siam tha lo a nih chuan, kan ram hi a tlu chhe dawn… tiin a sawi a.
Mizoram dinhmun hi ralkhat atanga han thlir vang vanga han x-ray hian, tlukchhiat theihna chance a lo ngah dawn hle mai, a tih theih.
Zirna hi chu siam that a lo ngai viau a nih pawhin, duh thala her danglam zung zung theih mai a la ni a, siamthat a la harsa vak awm lo ve.
Chutih rual erawh chuan, Mizoram tlukchhiat theihna dangte hi han thlir kual leh ta ila, a tam zawk hi chu education system siksawi anga awl-ai a ni lo ang tih a chiang reng mai.
Mizoram mihring nunna suat mektu – Ruihhlo, HIV/AIDS leh Cancer te hi Mizoram tlukchhiat theihna langsar zual pathumte an ni phawt ang a, heng bakah hian Eirukna leh Hlemhletna (hnam hming hralh chunga sumdawnna etc) te hi a ruka min ker ngar ngartu ‘Nget’ thi thei lo an ni bawk a. Pamham avanga kan chenna ngawih ngawih, leilung leh environment tihchhiat pawisaklohna ‘pamhamna’ hi Mizoram tlukchhiat theihna a ni bawk ang.
A khaikhawmnaah chuan, heng zawng zawng lo thlen theihna chhan, a bul tumtu ber chu — Rorêlna dik leh felna te hi luipui kang ngai lo anga a luan thin loh vang, a ni ber awm e.
Kan ram leh hnam humhim tura thawk tur, kan aiawh tura mipuiin kan thlan chhuahte hian, thlan tlin an niha an lawmna hi, sum leh pai, hamthatna dawng theia an awm vang nge, mahni inphat chunga ram leh hnam tana rim taka thawk thei dinhmuna an din vanga lawm em em thin an nih, tih hi chhut tham fe a ni. Ram leh hnam hmangaihna tak tak nena ram rawngbawl hna thawktute hi chu an thih hnu, kum tam tak a liam tawh hnuah pawh an ‘birthday lawm dan tur’ kan la rel luih luih zel zawng a nih hi. Chutiang mi chu kan ram roreltute zingah hian an awm ve ang em?
Hei hi hruaitute demna ngawr ngawr a ni lo a, mipui lam pawhin mawhphurhna lian tak kan nei a, roreltu dik lo kan thlang a nih chuan kan phu tawk hi a lo ni ve reng thei tho a ni.
Mizoram tlukchhiat theihna…
