Tourism minister Lalnghinglova Hmar chuan NITI Aayog member Dr VK Paul hmu in Mizoram Tourism Conclave buatsaih a nih theihnan rem ruatpui turin a ngen.
Zirtawpnia New Delhi-a an inkawmnaah Tourism minister chuan, tunhnaiah Mizoram tlawhtu an pung a, Guwahati atangin tlai khat thilthuah Aizawl a thlen theih tawh a. Thlawhna leh rel a inkalpawhna a awlsam tawh avangin Mizoram tlawhtu an pun zel an ring tih a sawi. An state tlawhtute lo dawnsawn dan tur, an thlenna leh ei leh in chungchanga inbuatsaihna, an en tur leh tih tur lo siamsak chungchangah hmalakna tur tam tak a la awm, tiin, theihtawp chhuah mah se, thlen tawp chin an nei a, NITI Aayog-in rem a ruatpui a, hma lakpui a ngai tih a sawi a ni.
NITI Aayog member chuan Mizoram chu tunhnaiah 100% literacy rate nei thei, state ralmuang leh tlawh chakawm a ni, tiin, Tourism Conclave chu Mizoram thatna leh mawina phochhuahna remchang a ni dawn a, a tulna apiangah Mizoram sawrkar pui turin NITI Aayog a inhawng tih a sawi. Mizoram tlawhtute bakah state mipui kaihhruaina atan Tourism Policy mumal tak buatsaih thuai a tul tih a sawi bawk.
An inkawmna atang hian Mizoram Tourism Conclave hi Aizawl emaw a bulhnaiah hman nise, tiin an rel a; a hun atan kum chanve hnulam, boruak nawm lai nise tih a ni. International Tourism Mart emaw Mizorama Kut awmsa nen kaihkawpa lian leh zau zawka hman dan ngaihtuah tha tih a ni.
Conclave atana inpuahchahnan, kumin kum chanve hmalamah New Delhi-ah kokim zawka thutkhawm leh nise, an ti a. Hetah hian sawrkar mi pawimawh bakah Delhi-a tourism kaihhnawih pawl pawimawhte sawm nise, NITI Aayog-in hma lo la se, an ti. Mizorama a taka tourism kaihhnawih eizawnna kalpuitute aiawh sawm tel nise tih a ni bawk.
Inkawmnaah hian India Tourism Development Corporation leh NITI Aayog hnuaia Tourism Wing aiawh an tel.
Mizoram Tourism Conclave rawtpui
