Daily Newspaper

Mizoram volleyball hmachhawp

14

Kum 2020 atana Mizoram Volleyball Association (MVA) meeting hnuhnung ber chu kum liamta December ni 21 khan Aijal Club-ah koh niin, an pawl president Er. H. Lalzirliana’n rorel a kaihruai an an kal zelna tur atana hma-chhawp hrang hrag an rel.

Meeting hian hripui (Covid-19) avanga volleyball tournament huaihawt a theih loh lai pawha khua leh veng hrang hranga volleyball practice hmuh tur an awm reng leh Mizoram volleyball-in hma a sawn zel chu lawmawm a ti a; 2020-23 Volleyball Federation of India vice president atana MVA senior vice president Dr. Lalmalsawma Nghaka thlan tlin a ni chu lawmawm an tih thu leh MVA-in lawmsak ngei se tiin thu an dah nghal.
An hmachhawp hrang hrangte thlir ila.

PRO VOLLEYBALL LEAGUE

Covid 19 avanga kum 2020-a buatsaih theih tak loh Pro Volleyball League chu kum 2021-ah hian Sawrkar phal chin (SOP) zawm chunga huaihawt theih ni se tih a ni a, a hun atan 2021 May/June ruat niin, media partner LPS-te nen la ngaihtuahho leh ni se tih a ni.

SECOND WINDOW TRANSFER

Mizoram puma volleyball club-te’n an register player-te an siksawi hun (second window tranfer) hun siam meeting chuan tha a ti a, a hun atan January 28-29, 2021 ruat niin, second window transfer hi Pro Division Club, District Volleyball Association leh Zone Volleyball Association-te’n a rualin an hmang vek ang.

INTER BRANCH YMA VOLLEYBALL TOURNAMENT

Kum 2020-a CYMA leh MVA-in Inter Branch YMA Volleyball Tournament buatsaih ho an tum chu hripui avanga thulh a ni a, Central YMA Sports Sub-Co-mmittee-in kum 2021 atan huai-hawt leh ni se tia rawtna CEC lama a thlen chu MVA-in lawm-awm a ti a, kum 2021-ah sawrkar SOP zawm chunga Inter Branch YMA Volleyball Tournament buatsaih a nih ngei theihna’n MVA chu zau takin a inhawng tih an tarlang a, hmalak tul apiangah a inhuam tih an tarlang tel.

REFEREE & COACH REFRESHER COURSE

Hripui avanga MVA Referee leh Coach chawl thupte chawhharhna’n leh technical lama hmasawnna thar an neih theihna’n kum 2021 January thlaah MVA Referee & Coach Refresher Course buatsaih tura ruahman a ni a, MVA Technical Committee lamin an buaipui ang.

VIRTUAL VOLLEYBALL SKILLS COMPETITION

Hripui avanga volleyball tournament pangngai siam a nih theih rihloh avangin volleyball player-te tana mahni khua/veng/awmna hmun theuh atanga an volleyball thiamna hmanga intih-siakna buatsaih tum a ni a, kum 2021 January thla hian MVA VOLLEYBALL SKILL CO-MPETITION huaihawt tur a ni a, lawmman tha tak siam a ni ang a, category hrang hrang a awm ang.

INTER DISTRICT VOLLEYBALL TOURNAMENT

Kumtina MVA-in District Volleyball Association team-te tana Mizoram hmun hrang hranga a buatsaih thin Inter District Volleyball Tournament chu kum 2021-ah pawh sawrkar phal chin zawm chunga buatsaih leh ngei ni se tih a ni a, he Inter District Volleyball Tournament 2021 hi Khawzawl District Volleyball Association-in an thleng ang.

A hun atan March ni 2-5, 2021 ruat a ni a; Organising Committee ruat fel nghal niin, MVA Vice President Lalmawizuala chu Organising Chairman atan ruat niin, MVA Asst. Secretary Johny Zonunmawia chu Organising Secretary atan ruat a ni.

Kum 2020 Inter District Volleyball Tournament kha Siaha khawpuiin a thleng a, mipa lamah Saitual DVA an champion a, hmeichhiaah Aizawl DVA chu champion lai an ni.

Read More>> Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy