uapa member neih belh tuma an beih meknaah BJP Mizoram hruaitute chuan member an hmuh tam theih loh chhan an sawi.
BJP National Membership Enrollment Drive- 2024 thlirletin Pathianni khan New Delhi-ah BJP National president JP Nadda hoin an thukhawm a. BJP State Membership Enrolment Drive – 2024 convener, State general secretary Lalthangmawii leh co-convener K Hramo, MLA te an tel.
BJP Mizoram hruaitu Lalthangmawii chuan Mizorama membership drive kalpui mek chu state dang angin kalpui chak a har tih a sawi a. Internet connectivity that loh vangte, inkalpawhna kawng that loh vang leh khaw tam tak lawnga kal ngai a awm avangin membership drive neih a harsa tih a sawi. Mizoramah Kristianten BJP chu Hindu party tia an beihna avanga hma lak a har thute a sawi a. Chak zawka membership drive kalpui a nih theihna atana mamawh hrang hrang a thlen bawk.
Mizoram Sadasyta Abhiyan co-convener K Hramo, MLA pawhin Mizoramah BJP hmeh mih tumin state-a party leh kohhran ten nasa takin bei mah se, kawng hrang hranga Covid lai atanga an hnathawh dan mipuiin an hmu chho zel a, BJP chuan ngheh lam leh than lam a pan zel tih a sawi.
BJP National president, Union Health minister ni bawk JP Nadda chuan BJP Mizoram harsatna tawh mek chu lo enzui pui a nih tur thu leh an mamawh anga tanpui a nih tur thu a sawi a ni.
Mizorama BJP than chak loh chhan an party hruaitute hrilh
