Daily Newspaper

Mizorama khaw lian 23-a fai inelna bul tan; Covid donaa dan zawm dan endik tel tum

25

Aizawl, October 3 : Urban Development & Poverty Alleviation Department buatsaih Mizorama khaw lian zual 23-a faina intihsiakna tur chu Zirtawpni khan hawn a ni a. A hawngtu UD&PA changtu deputy chief minister Tawnluia chuan faina intihsiakna endik rual hian heng khuaa Covid-19 doletnaa sawrkar inkaihhruaina siam an zawm that leh that loh endik a ni nghal dawn tih a sawi.

UD&PA department hian Mizoram khaw lian 23 fai inelna bakah Swachh Survekshan inhrilhfiahna atan hmangin Faina Hapta an hawng nghal a ni.

Ramin a mamawh, khawpui tihchangtlun leh tihhmasawn kawnga UD&PA Department-in theihtawp chhuaha hna a thawh meknaah Swachh Bharat Mission (Urban) chu Mizoram khawpui 23-ah faina leh thianghlimna kawnga hmasawnna thlentu Mission hlawhtling tak a ni tih deputy chief minister hian a sawi a. Bawlhhlawh sawngbawl kawngah tehna thawh dan tha leh daihrei zawk kawhhmuhtu leh vantlang inthiarna thazawk kan neih theih nan Mizoram khawpuite tan a thawhhlawk hle, tih a sawi bawk.

1977 October 2 atang khan Faina Hapta hi kumtin Mizoramah hman a ni a, hemi chhung hian Aizawl mai ni lo, Mizoram khawpui hrang hrangah kartluanin sawrkar pisa, zirna in, damdawi in leh hmun hrang hrangah faina beihpui thlakna atan hman thin a ni. Kuminah pawh he Hapta hi khaw lian 23-ah chuan faina leh thianghlimna kawnga infuihtharna atan leh a taka chet lak hunah hman a ni dawn a ni.

Swachhta rankings pawh kalpui a ni anga; zirna in, sawrkar pisa, dawmdawi in, VC/LC area, hotel, bazar leh restaurant-ah te fai endik a ni dawn tih Tawnluia hian a sawi a. “Khaw lian bik fai intihsiakah hian Covid-19 doletna atana sawrkar inkaihhruaina dan an zawm that leh that loh pawh endik tel a ni dawn a ni,” a ti.

Deputy CM sawi danin, khawpui fai intihsiakna hi ram pum huap fai endikna – Swachh Survekshan zulzuia kalpui tur a ni a. Khaw 23 hi ODF (pawnlera inthiar awm lohna) a nih vek tawh avangin kuminah chuan ODF Plus nih tuma hma lak a ni. Bawlhhlawh sawngbawl kawngah mahni in emaw dawr leh eizawnna hmun hrang hrangah tawih thei leh tawih theilo thliarhrante, bawlhhlawh hman nawn theihte a tangkai zawka hmannawn dan kawng zawn (reuse/recycling) leh bawlhhlawh tawih thei atanga leitha siam (composting) leh bawlhhlawh paih tihtlem chu kumin fai intihsiakna leh Swachh Survekshan endikna atana pawimawh zual tur te a ni.

Mizoram Khawpui Fai Intihsiakna hi kum 2017 atangin UD&PA Department-in a kalpui a. Biate khua, Khawzawl district-in Mizoram khawpui fai ber nihna a hauh mek. Mizoram district headquarters 11-te category-I ah awmin, khaw dang 12 hi category-II ah an awm anga, khawpui 23 atang hian khawpui fai ber thlan a ni leh dawn a ni. He intihsiakna atana inbuatsaihna tha zawk kalpui a nih theih nan Ministry of Housing & Urban Affairs-in Swachh Bharat Mission (Urban) hnuaia kum 2016 atanga a kalpui tawh Swachh Survekshan, ram pum huap fai endikna tura inkaihhruaina bu (toolkit) a buatsaih chu behchhan a ni.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy