Daily Newspaper

MIZORAMA OIL PALM CHIN CHANCHIN

12

Wg Cdr Lalnghinglova(Retd)

Oil Palm hi Mizote tan thil thar a ni lo va. Kum 16 chhung Mizoramah chin ni tawhin, Oil Palm huan siama ei zawng mi eng emaw zat an awm tawh a. Oil Palm hi Mamit, Kolasib, Aizawl, Serchhip, Lunglei, Lawngtlai leh Siaha district-ah te chintir a ni.

Mizorama Oil Palm chin tan hmain a chanchin zir chianna neih hmasak a ni a. Zir chianna chu Malaysia ram (Oil Palm chin uarna ram)-ah leh India rama Oil Palm chin tamna States Kerala, Karnataka leh Andhra Pradesh-ah neih a ni. Tin, Indian Institute of Oil Palm Research Centre (IIORC), Padavegi, West Godavari District, Andhra Pradesh leh IIORC Palode, Kerala- ah Oil Palm Scientists te hnen atangin Oil Palm chanchin zir chianna neih a ni bawk. Zir chianna hi Agriculture Department-a mithiamte kaihhruaina hnuaia neih a ni. Tin, hengte bakah Agriculture Minister Pu H Rammawi pawhin Oil Palm Conference-ah te kalin Oil Palm chungchang a lo zir chiang lehzual a, ani pawh a fimkhur hle a ni. Zir chianna atang chuan Oil Palm hi chin manhla leh thar hlawk thei tak a ni tih hriat chhuah a ni. Kum tluana hring reng (Ever green) a ni bawk.

Zir chianna neih hnuah Mizoram State Assembly-ah “The Mizoram Oil Palm (Regulation of Production and Processing) Act, 2004 chu ni 8.12.2004-ah passed a ni. Ka hriat danin thlai pakhat ching tura ahranpaa dan siam vawi khatna a ni a. Mizoram sawrkar a fimkhur hle. He Oil Palm Act hi Gazette Notification hmanga puan zar leh hriattir a ni. Tunah hian a copy pawh hmuh theihin a awm.

Kum 2004 hma lamah chuan Oil Palm hmun siam hi Mizote tih ngai loh a nih vangin, hmalak puitu turin Oil Palm ching thin Company 3, Godrej Agrovet Ltd (GAVL), Foods Fats and Fertilizers (3F) leh Ruchi Soya Industries Ltd te thlan an ni a. GAVL hian Mamit leh Kolasib district-ah hma an lakpui a. Ruchi Soya Industries Ltd hian Lunglei leh Lawngtlai district-ah hma an lakpui a. 3F hian Aizawl, Serchhip, leh Siaha a chang a ni. Heng Company 3 te nena thawhhona tur thuthlung (Memorandum of Understanding) te ziaka dah thlap hnuah chauh hmalak tan a ni. Contract Farming hmanga chin a ni a, company te hian a chingtute thar chhuah a rah lei ngei hi an bat a ni.

Oil Palm chi tiak tir (Sprout) hi Thailand, Costa Rica leh India ram atanga chah thlen a ni a. Air Cargo anga lakluh leh Air Cargo thlen theihna hmun hnai ber Guwahati atanga by road-a lo kal a nih vangin a kal man hi a sang hle a ni.

A chiin Mizoram a lo thlen hnuah Oil Palm nursery-ah thla 10 – 15 inkar enkawl len a ni a. Chu mi hnuah Oil Palm ching tura thlan te hnenah man chawi lova sem chhuah a ni.

Oil Palm tiak chu meter 9 (30 feet) kar dana phun a ni a. |in 2½ hmun (1 hectare)ah hian kung 143 chauh a leng tawk a, thlai dang nena khaikhin chuan Oil Palm hian hmun a duh zau hle a ni. Oil Palm zar a sei em avangin feet 30 dana phun hi a tawk chauh a. Mi thenkhatin feet 20 vel kar danah te an phun a. Hlawhtlin tur anga hlawhtlin lohna a siam a ni.

Oil Palm hi kum 4-na atangin a rah tan a. Kum 4-a upa a nih hma chuan rah tan mahse rah tir loh tur a ni. Kum 4na atang chauha rah tantir a tha. A rah tan hnuah chuan kum tluan deuhthaw (Thla 10) chhung a rah a. Thlasik laiin a chawl ve thin a. A huan siamtuin kum tluanin sum a la lut thei.

Company 3 te hian an chan area chhungah Oil Palm rah leiin a oil herna khawl an bun tur a ni a. Khawl bunna tura Sawrkar laipui puihna cheng Vaibelchhe hnih leh a chanve (Rs 2.5 Crore) pawh pek theuh an ni. Mahse, GAVL chauhin khawl a bun avangin Company dang 2 te chan tur chu Sawrkar laipui hnena thawn kir leh a ni.

Oil Palm rah leina rate chu kg-ah Rs 4.50 a ni thin a, a hnu lamah Rs 5.50- ah a chho a. Kumin (2021) January thla atang khan sawrkar laipuiin a rah lei nan support price kg-ah Rs 4.50 zel a rawn pe a. He support price Rs 4.50 nen chuan a rah leina rate chu kg-ah Rs 10/- a lo ni ta a. Sawrkar puihna pawh chu an Bank Account-ah dah luh sak vek a ni tawh. Oil Palm chingtute an lawm hle. Tunah hian a rah leina rate hi tihsan tura ruahman a ni a, Kg-ah Rs 12.30 aia tlem lo ni tura rel a ni. Oil Palm huan tin 2 ½ hmun nei tan kum tin Rs 3,07,500 lakluh theih a ni ang. Tlangram lo neih ai chuan Oil Palm hmun siam hi a hlawk zawk a ni.

Mamit leh Kolasib district chhungah hian Oil Palm huan nei tha mi tam tak an awm a. Heng mi te hian huan an enkawl tha bawk a. A rah hralhna man sum pawh an tel tha hle a. Sum lalut tam ber chu Pu Ramrinchawma, Nalzawl, Mamit district (Ph; 9612510977) a ni a. Oil Palm rah hralhna man cheng vaibelchhe khat (Rs 1crore) aia tam a lalut tawh a. Midang Rs 1 crore lalut pha lo hret te pawh an awm nual bawk.

India ram hian ei leh bar thar chhuaha intodelh tumin hma a la a. Buh thar chhuah tam, Green revolution a thleng tawh a. White revolution ( Bawnghnute thar chhuah tam) a thleng leh a . Blue revolution (Sangha thar tam) a thleng tawh a. Tunah hian yellow revolution- tel ei chi (edible oil) thar chhuaha intodelh tumin sawrkar laipui hian hma a la mek a ni.

India ram hi edible oil thar chhuah lamah a intodelh lo va, a mamawh zat zaa sawmli chauh a thar chhuak a. A mamawh zat phuhru turin ram dang atanga lak luh (import) a ngai a. Lak luh nana kum tina senso ngai zat chu cheng Vaibelchhe 77,000 vel a ni thin. Ram dang atanga tel ei chi lak luh nan India Foreign exchange lakluh dollar tam tak sen ral a ngai thin a ni.

Sawrkar laipui tuna ding mek hian tel ei chi thar chhuaha intodelhna turin Oil Palm chin uar ni se tiin ni 18.8.21ah khan thutlukna a siam a, India hmarchhak States leh Andaman Island-ah Oil Palm chin theihna ram hectare nuai 3.28-ah hmalak ni se a ti a. Mizoramah chuan 2000 hactare ramah chin thar tum a ni.

Tel pai thlai te zingah Oil Palm hian tel a pe chhuak hnem thei ber a. Oil Palm huan hectare khata zauvah hian kum khatah Palm Oil tonne 4 emaw tonne 5 emaw a thar theih a. Oil Palm hmun hectare 2000-a zauvah chuan Palm Oil tonne 8,000– 10,000 a thar theih dawn a ni. Palm Oil bakah hian a rah mu (kernel) oil a awm bawk a. Kernel Oil hi Palm Oil aiin a man a to zawk a ni.

India Sawrkar ruahman ang chuan Oil Palm chinna hmun zawng zawngah link road tha siam a ni ang a. Oil Palm chin tawhna area chhunga link road awm lai chhe tawh tak te chu siam tha vek tura ruahman a ni.

Sawrkar laipui thiltum National Mission on Edible Oil – Oil Palm (NMEO – OP) puan zar a nih hnuah dodalna a ri nghal a. Dodalna leh sawichhiatna te chu hengte hi an ni:

Oil Palm in Ram a ti chhia, sik leh sa a tibuai, khawlum a siam.
Oil Palm-in tui a heh a, tuihna a tibuai a, tuihna a kang chat.
Lei a ti chhia, ram a ti chereu nasa, nungchaten an thih phah.
A hmun siamtu tam takin an hlawkpui lo.

Kum 2005 vela Oil Palm chin tan dawn pawhin dodalna a awm a. A oil hi mihring hriselna atan a tha lo, hling a ngah a, a hlingin tur a nei; Oil Palm hmunah nungcha an awm thei lo; Ram a heh a, a hlawk lo, etc te chu Oil Palm sawichhiatna a ni.

Indian Institute of Oil Palm Research (IIOPR), Padavegi, Andhra Pradesh-534 450 Technical Bulletin (2016) ah chuan thlai pali, Balhla, Fu, Buh leh Oil Palm ten tui an mamawh zat zir chianna result an tichhuak a, hetiang hi a ni:-

Boruak tibaltu leh khawlum siamtu ber chu Carbon dioxide(CO2) a ni a. CO2 ei ral chak ber leh hnara thaw zawng zawngte mamawh Oxygen pe chhuak tam ber chu Oil Palm a ni. Chuvangin Oil Palm chin hi a hlauhawm lo a ni. Sawrkar laipui ruahmanna hi Mizoram tan thil tha lo a ni lo a. Tripura-ah chuan rubber hmangin loneitu tam takin tlangram lo neih an bansan a, rubber huan an siam a. Mizoramah pawh Oil Palm leh rubber huan siamin tlangram lo neih bansan theih a ni.

Tuna Oil Palm chin tumna zau zawng chu 2000 hectare a ni a. Mizoram zau zawng 21,081 sq km nena khaikhin chuan 0.0948 percent chauh a ni. 0.1 percent pawh a tling phak lo a ni.

Palm Oil hian vitamin A leh E a pai hnem a, oil tha tak leh kan hriselna atan a tha hle a. Vitamin A hian khawthima thil hmuh theih lohna (night blindness) a veng a. Sam, vun, tin, ha, ha hni, glands (thalbe) leh ruh tan a tha a. Chuap cancer pawh a veng thei. Vitamin E hi kan nunna atana pawimawh em em red blood cell vawng thatu a ni a, kan hrisel nan a pawimawh hle a ni.

Tunlaiin thalaite zingah, abikin hmeichhia te zingah Palm Oil a lar hle a. An sam leh vun enkawl nan an hmang. Tha na tan pawh a tha an ti leh zel a ni. Vun ro, kephah hnuai ro leh ke sir khi tan pawh a tha an ti a. Fakna a tam hle.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy