Sawrkar laipui Ministry of Minority Affairs secretary Katikithala Srinivas hoin sawrkar laipui ruahman (scheme), Pradhan Mantri Jan Vikas Karyakram (PMJVK) hnuaia project kalpui tawh leh hnathawh thlirletin Aizawlah Ningani khan thutkhawm a ni.
PMJVK hnuaia hmalakna hrang hrang sawi ho niin, hnathawh tawh thlirlet bakah hma lak zel dan tur sawi ho a ni a. Sawrkar department hrang hrangin project an lo kalpui tawh dan thlir niin, kalpui zel dan tur sawi a ni.
Thutkhawmah hian department hrang hrang secretary-te an tel a, district tin bawrhsap leh a kaihhnawih sawrkar official an tel bawk.
PMJVK hi sawrkar laipuiin hmun thlanbikte tih hmasawn nan a ruahman a ni a. Hemi hnuaiah hian hmun thlanbikah khawtlang mawmawh hmasawnna ruhrel leh mipui vantlang nitin mamawh tul siamsak a ni. State leh sawrkar laipui tangdunin funding ruahman a ni a, hma lak zui leh enkawl hna chu state sawrkar leh UT tin ten an kutken a ni.
PMJVK hnuaia rawtna leh hmachawp chu State Level Committee emaw UT-a chief secretary tinte kaihruaina hnuaiah, hmun thlanbika mipui chengte mamawhna mil zela kalpui (recommend) thin a ni.
Central Minority Affairs secretary hian Ningani vek khan larsap Dr Hari Babu Kambhampati chu Raj Bhavan-ah a hmu a. Mizorama minority-te dinhmun an sawidun. Sawrkar laipui hnuaia scheme hrang hrang hmanga hma an sawn theih dan tur sawiin, minority-te kaihhnawih thil pawimawh tak tak an sawi bawk. K Srinivas hi District Council & Minority Affairs secretary Dr H Lalthangliana’n a tawiawm a ni.
Mizorama PMJVK kalpui dan sawiho
