Mizorama ruhro hmuh zinga
upa ber kum 700 kalta ami
Mizorama mihring cheng tawh zingah an ruhro hmuh theih maiah, tunlai thiamna hmanga a upat zawng tehnaa an la hmuh upat ber chu kum 700 kalta ami a ni.
Thawhtannia Assembly Session-ah hemi chungchang hi sawichhuah a ni a. Champhai district Dungtlang rama mihring ruhro hmuh leh Saitual district North Khawlek rama mihring ruhro hmuh chu endik an ni tawh a, carbon dating tih niin North Khawlek ram ami hi kum 1260 AD atanga 1320 AD inkara thi, kum 700 chuang a upa an ni tih finfiah a ni tawh a. Dungtlang ram ami hi AD 1740 atanga 1800 vel nia a ni tih finfiah a ni.
House-a zawhna chhangtu Art & Culture minister C Lalsawivunga chuan, North Eastern Council atanga cheng nuai 18 hmuh hmangin Champhai district Dungtlangah archeological excavation neih a ni a, mihring ruhro la in carbon dating ti turin Beta Analytic, Florida USA-ah thawn a ni a, kum 1740 atanga 1800 AD vel nia sawi a ni. He excavation hi kumin January 10 khan zawh a ni tih a sawi.
DNA zirchiang turin Birbal Sahni Institute of Palaeosciences, Lucknow-ah scientist-te hnenah ruhro sample hi pek a ni tih a sawi bawk.
North Khawlek-a Thingkhuang ngawa puk pakhata mihring ruhro pawh Miami Florida-a laboratory-ah tho hian enfiah tir a ni a, result pawh hriat a ni tawh tih a sawi a ni. Assembly speaker Lalbiakzama chuan N Khawlek hi a bial chhung ami a ni a, ruhro an hmuhchhuah, carbon dating tih atangin kum 700 chuanga upa an ni tih finfiah a nih thu hi a sawi ve bawk. “DNA sequencing tih tum mek a ni. Thlang tla hmasa an ni a, Mizote an ni reng em tihte zawhna pawimawh tak a awm a ni,” a ti.
Art & Culture minister pawhin Mizoten kan history kan hmuh theih leh chhiar theih atangin thlang kan tlak dan mumal tak ziaka dah kan la nei thei loa, kan chanchin, kan lo chhuah dan pawh mumal leh chiang taka ziak thei kan la nei chiah loa, Mizorama hmun hlui leh thlan hlui atangin theih ang angin archeological exploration kalpui mek a ni tih a sawi.
Mizorama ruhro hmuh zinga upa ber kum 700 kalta ami
