NSUI Mizoram president RB Lalmalsawma chuan Congress hruaitu Rahul Gandhi chu Mizoram tlawh turin a sawm a. BJP sawrkar leh a thurualpuite paihthlak an ngaih avangin Mizoram pawh rawn zin ngei tura ruahmanna Mizoram Pradesh Congress Committee hotute nen an sawiho tawh thu sawiin, Mizorama zin a tum thu a sawi.
Judega (Jurega) Vidyarthi Jitega India (Zirlaite hi kan tanrual chuan jan hneh thei a ni. India) tih thupui hmangin All India Congress Committee hnuaia state hrang hrang National Student’s Union of India hruaitute chu New Delhi-ah kohkhawm an ni a. August 1 & 2 khan an thukhawm.
A ni khatnaa NSUI Executive Body thutkhawm chu Congress leader Rahul Gandhi hian telpuiin, NSUI hruaitute nen an inkawmnaah, kan tun dinhmun thlirin thalai, zirlaiten hun thim tak kan tawng mek a, BJP sawrkarin ram mipui min then hrang a, hnam hnuaihnung zawkte min rapbet mek a, mi hausa leh rethei inkar a zau ta hle a, Manipur-a thil thlengah a langchiang hle, tia sawiin, zirlaite leh thalaiten kan hmalam hun ngaihtuaha huaisen taka kan beih a ngai tih a sawi.
NSUI Mizoram atangin president RB Lalmalsawma leh general secretary Jerome Bawlte te an tel a. RB Lalmalsawma pawhin thu sawiin, ‘Rahul Gandhi-a’n India mipui inpumkhatna kawngzawh – Bharat Jodo a huaihawtnaa zirlai hmeichhe naupang pakhatin lehkha a thawn – ‘Rahul, kal zel rawh. Zirlai, thalaite tan, kan hmalam hun atan leh India mipui tan beizel rawh. I kiangah awm ve thei lo mah ila, kan thlawp tlat che’ tia a thawn chu Mizoram atang pawha an lo hriat ve thu a sawi a. Gandhi chhungkua chu Mizoram state ngainatu chhungkua an nih thu leh an chhungkuain Mizoram chu an tlawh fo avangin Mizoram mipui pawhin Rahul-te chhungkua chu an ngaina tih hrilhin, Mizorama zin turin a sawm a ni.
Mizorama zin turin Rahul sawm
