Covid-19 natna vei hriatchhuah thar an awm leh a, Thawhtanni khan mi pathum hriat belh niin, Mizoramah he natna vei hriatchhuah mi 1011 an tling ta.
Hriatchhuah tharte hi Kolasib District-a Rapid Antigen Test hmanga hriatchhuah an ni a, lirthei khalhtu, mipa vek, kum 22 leh 42 inkar, Assam atanga rawn lut an ni. Covid-19 lanchhuah dan natna engmah an nei lo.
ZMC-ah sample 294 endik a ni a, an negative vek tih thu dawn a ni. ZMC-ah hian Covid-19 natna vei mi 73 enkawl mek an ni a, pakhat chu a khua a sik bakah a thaw a hah a, ngaihtuahawm a ni lo tih thu dawn a ni. Dam lo dangte’n harsatna an nei lo tih thu dawn a ni bawk.
He natna vei hriatchhuah tawhte hi mipa 834 leh hmeichhia 177 an ni a, an zinga mi 589-te chu dam tawh, damdawi in atanga chhuak tawh niin, mi 422 chu enkawl lai an ni.
(THE AIZAWL POST – Tualchhung)
Full>> ePaper Subscribe
