Tunhnaia Manipur-a Zofate chunga thil thleng chungchangah Mizorama Meitei awmte sahimna ngaihtuah sak turin Mizoram sawrkar an ngen a, Manipur Imphal vela Mizo zirlai la awm mekte pawh an sahimna atan Manipur sawrkar an rin zawh loh avangin India sawrkar chu hma la turin an phut tih Mizo Zirlai Pawl chuan an sawi.
MZP Gen. Hqrs thuchhuak chuan, tunhnaia Manipur-a Zofa unau 10 Central Reserve Police Force (CRPF) ten Jiribam district-a an kahhlum leh a hnulam thil kalzelah, ruang post-mortem tih khawtlai, chumi hnua an ruang pek chhuah tih khawtlai leh Zofate duh dan ngaipawimawh loa helicopter-a ruang dah tura Manipur sawrkar leh India sawrkar hmalakna chu a lawmawm loh hle, tiin, ‘An kahhlum tawh hnuah pawh kan duh anga ruang kan buaipui a rem lo hi MZP chu a lungawi lo takzet a ni,’ a ti.
Mizoram mipui lungawi lo leh thinrimna inmung mek ngaihtuahin, Meitei tan tute emaw insum zo lo kut tawrh mai theihna a awm nia hria in, Mizoram sawrkar chu Meitei-te sahimna ngaihtuah turin a ngen tih MZP chuan a sawi a. Mizoram chhunga Meitei awmte pawh fimkhur turin a chah tih a sawi.
Hetihrual hian, Manipur khawpui Imphal-ah Mizoram atanga lehkha zira awmten Meitei kut an tawrh lohnan hma la turin India sawrkar a phut tih sawi bawkin, ‘MZP chuan Manipur sawrkar hi a ring loa, Mizoram atanga zirlaite himna chungchangah pawh Manipur nilo India sawrkar hmalakna a beiseiin a phut a ni. Mizoram atanga Imphal-a zirlai awmte himna atana hma lak a nih loh a, tuar an awm a nih chuan MZP chuan a ngai thutak hle ang,’ a ti.
Zofa unaute buainaah Mizoram a ralbang thei ngai dawn lo, tiin, Manipur sawrkarin Meitei firfiakte a khuahkhirh theih hma chu an state-a science leh technical institution hrang hranga Mizoram seat chu institution dangah beh tir rih turin India sawrkar a ngen MZP hian a sawi bawk.
Mizoramah Meitei Manipur-ah Mizo himna ngaihsak turin sawrkar ngen
