Daily Newspaper

Mizoramah mi tinin mobile phone nei

17

Tunlai khawvelah mobile phone hi mamawh bulpui pakhat a tling a, a tel lovin a awm theih loh a ni ber tawh. Mizoramah pawh a pung zel a, tunah chuan Mizoram mi tinin mobile phone hi an nei tawh ang a ni.

Mizoramah mobile phone hi 1,135,682 a awm a, chhiarpui hnuhnung bera mihring zat aiin a tam. 2011 chhiarpuiah khan mihring 1,091,014 an awm a ni.

Economics and Statistics department-in Ningani-a an tlangzar Statistical Abstarct bu-a a lan danin, Mizoramah mobile phone hi 1,135,682 a awm a, chhiarpuia mihring zat aiin 44,668-in a tam.

Statistical Abstarct bu-a mobile awm zat hi 2018-19-a mi kha a ni a, a hma kum 2017-18 khan 895,339 a awm. 2017-18 khan mobile tam lam hi a hma kum aiin a tlem a, 2016-17 khan 958,908 a awm. 2015-16 khan 817,272 a awm a, 2014-15 khan 811,574 a awm.

A district zawnga en chuan Aizawl District-ah a tam ber a, mobile phone hi 538,830 a awm. A tlem berna Mamit District-ah chuan 60,359 a awm.

Kum hmasa lam ang bawkin Airtel an lian ber a, Mizorama mobile phone zawng zawng zinga 457,566 chu airtel a ni. Anni hi kum nga chhung chu service operator lian ber an ni ta.

Operator naupang ber Jio an thang chak hle; Airtel dawtah an awm a, 312,143 an nei. A hlun ber BSNL-in an dawt leh a, 205,835 an nei.

Jio hi internet lamah an lar a, internet conectivity lama an chak avangin India ramah an thang duang hle. Mizoramah pawh an thang duang a, 2015-16 khan hmangtu 113 chauh an nei a, a kum leh 2016-17-ah chuan 87,710-ah a zuang dawrh. 2017-18 khan 160,102 an tlin a, hemi kum hian pathumna an ni. A kum leh 2018-19-ah chuan BSNL an pel ta a ni.

Mizorama mobile phone awm zat
District Mobile Phone
Mamit 60,359
Kolasib 83,314
Aizawl 538,880
Champhai 91,468
Serchhip 84,898
Lunglei 142,491
Lawngtlai 71,036
Siaha 63,186

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy