Ram engemaw zatah mipa ni lo, hmeichhia pawh ni lo an awm tawh a, voter list-ah pawh mipa ni lo, hmeichhia pawh ni lo an awm thin. India ram state thenkhatah pawh chutiang chu an awm a, Mizoramah chuan an la awm lo; Mizorama voter-te chu mipa leh hmeichhia vek an la ni.
Mihring nunah mipa leh hmeichhia hi khaikhin reng reng an ni a, tunge tam zawk tih te, tute nge thleng sang zawk tih te, chutiang chuan chanchinbuah te, zirna lamah te leh thil dangah pawh khaikhin an ni thin. Mizoramah pawh kawng hrang hranga khaikhin an ni a, hei hi a nasa telh telh niin a lang.
Mizoram electoral roll thar ber, kumin kum tira mi-ah chuan voter hmeichhia 433418 leh voter mipa 408970 an awm a, hmeichhia hi 24,448-in mipa aiin an tam.
Tun hnai engemaw lai atanga titi tlanglawn pakhat chu, Mizo mipa an thi nasa tih a ni. Economics & Statistics department buatih Medical Certification of Cause of Death (MCCD) tih bu thar berah chuan 2021 chhunga Mizoram boral, doctor-te hriatpuia boral zat tarlan a ni a, mipa 2,415 leh hmeichhia 1,321 an ni.
Mizorama kohhran lian ber Presbyterian Kohhran-a thalai pawl K|P inchhiarnaah pawh K|P member-ah mipa an thi nasa tih a lang; 2022-ah khan K|P member mipa 567 an boral a, hmeichhia 76 an boral. A hma kum 2021-ah mipa 386 leh hmeichhia 70 an boral.
Hnathawhna hmun hrang hrangah hmeichhia an thahnem a, dawr leh bazar velah te, rora chhutna hmun thlengin han thlir mai pawhin a tam zawk fe chu hmeichhia an ni tih a hmuh theih. Chutih laiin sorkar hnaah erawh hmeichhiain mipa an zat lo hle.
Economics & statistics department buatsaih Census of Govt Employees and Workers bu thar berah chuan Mizoram sorkar hnuaia thawk mi 54771 zingah mipa 37759 an awm a, hmeichhia chu 17012 niin, za zela 31.06 an ni pha chauh.
Thu dawn danin, thawktu tamna police-ah hmeichhia an awm mang lo tih tur a ni a, department hrang hrangah driver-ah hmeichhia an awm loh bakah field staff-ah hmeichhia an awm meuh lo bawk.
Mizoramah mipa leh hmeichhia
