India ram danpui hman tan ni, Republic Day chu ram chhung hmundang rualin Mizoramah hman a ni a. Aizawlah chuan Sipai Lammuala hman niin, larsap Dr Hari Babu Kambhampati chuan ram puanzar pawtparhin parade contingent 27-in zahna chibai an buk a chhanglet.
Republic Day vawi 75-na puala thuchah sawitu larsap chuan Zoram mipui chibai a buk a. 1950 January 26-a ram danpui kan inpek atang khan India ram chu mipui thlante rorelna ram lian ber a ni, tiin, “Danpui hi khua leh tui zawng zawng tan dikna, zalenna leh intluktlanna hum sak tlat tura duan a ni,” a ti.
Hmasawn tur chuan remna leh muanna a pawimawh tih a sawi a. A venhim hna thawktu police leh dan kengkawhtute hmalakna bakah NGO, kohhran, thuthar thehdarhtute leh mipui thahnemngaihna avangin India rama state muanawm ber a la ni chhunzawm chu lawmawm a tih thu a sawi.
Larsap chuan a sawrkarin state sumpai dinhmun sawhnghet a, tihmasawn turin hma lak a tum tih a sawi a. Sawrkar sum hmuh leh hmanral inbuk tawk leh sum enkawl dan fel tak, inrenchem, hmasawnna kaihhnawih loa sum hman tihtlem leh hmanraw hrang hrang enkawl leh hman dan tha leh fel zawk kalpui tum a ni dawn tih a sawi a ni.
“Kan sumpai dinhmun sawhnghet turin insingsaknan hun engemawchen kan mamawh ngei dawn a. Sawrkarin sawrkar hmasa hmalakna chhunzawm awm chu a chhunzawm zel dawn a. Ruihhlo hmansual dona leh ruihhlo ngaite enkawlna lamah nasa leh chak zawkin hma lak a ni ang,” a ti.
Republic Day pual lawmman sem a ni a. Kumina police officer leh police hnathawk tha chawimawina dawngtute hnenah chawimawina tangkapui hlan a ni.
Mizoram atangin mipui vantlang rawngbawlna atana a hun puma inpe, Sangthankima chu Padma Shree 2024 chawimawina dawng tura thlan a nih thu puan a ni bawk.
Mizoramah Republic Day hmang
