Daily Newspaper

Mizoramah Thangram

11

Kum 2001 September ni 11-a World Trade Centre-in beih a tawh ni kha 9/11 tia sawizui a ni a. Kum 2008, November ni 26-a Mumbai Taj Hotel beih ni kha 26/11 tia sawi zui a ni bawk a. Assam sawrkar official ten Thinghlun thlam an rawn hal ni, October ni 9 pawh kha, 9/10 tia chhinchhiah leh sawizui hlawh tawh tur niin a lang.

9/10 thil thleng kha a thinrimthlak a, a titute an demawm a. Mizoram sawrkar pawhin Karimganj district official-te chetdan demin, dan piah lama an chet avangin Assam sawrkar-ah leh Ministry of Home Affairs-ah ziakin lungawilohna a thlen a. Mizoram mipui kan thinrim a, Zoram khawvel Zofate kan thin a rim tlang a ni ber e.

9/10 khan a lehlamah Zofate inpumkhatna a rawn chhem alh zual sauh a tih theih awm e. Tun dinhmunah, Assam sawrkar hnuaia Zofa chipeng hrang hrang chenna khaw 24 huam chhung atangin Thangram Indigenous Peoples Movement(TIPM) a lo chhuak ta a. Hei hi Thinghlun thlam halin a hliau harh ti pawhin a sawi theih awm e. TIPM hruaitute chuan Thangram area-a khaw 24 te chuan Mizorama awm an duh thu leh Thangram chin chu Mizoram chhunga rin luh a nih theih nan hma an la mek tih an sawi a, Prime Minister leh Union Home Minister hnenah memorandum pawh thehluh an tum tih an puang tawh a. Hemi chungchangah hian TIPM hruaitute chu Aizawlah lokalin an duhdan leh an thiltumte an rawn tlangaupui mek a, theihtawp lo chhuahpui ve turin Mizoram mipui an rawn sawm a ni.

Tuna ramri buai chinfel loha la awm mek, kan ram chin tia kan hauh mek mel 509 huam chhunga Zofa chipeng hrang hrang awm mek ten Mizorama rin luh an nih theih nana anmahni ngei an rawn thawkchhuak ta hi, Mizoram tan chuan puanven sawi chhing chunga tan lo lakna remchang tak a ni a. Ramri bul hnai, abikin Vairengte chhehvel leh Saihapui V huam chhunga ramri depa cheng mekte development tawktarha inchuh reng renga kan hmanhlel laia Thangram area lam mipuiten hetiang thu leh hla an rawn nei ta hian, tuna ramri buai chungchanga sawrkar laipuiin nakum March thlaa chinfel a tum thu a lo sawi tawh atana inbuatsaihna hmanrua tha tak pakhat a tling dawn ta niin a lang bawk.

Thangram huam chhunga a mi chengte berin an awm duh zawkna an sawi chian tawh ber ahnu, hei lo liama bel chhunga sa; bel chhunga sa awm reng tawh chu ei mai tur niawm tak a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy