Mizoramah Voters’ Day hmang

Mizoramah Voters’ Day hmang
January 25 khan India ram pumah National Voters’ Day hman a ni a. Mizoram district hrang hrangah pawh hman niin, a hmanna pui ber Aizawlah chuan chief electoral officer Mizoram Dr Lalrozama hoa hman a ni.
National Voters’ Day (NVD) hi voter naupang zawkte ram hruaitu thlannaa tel tura chawhphurna atana sawrkar laipuiin a ruahman a ni a. 2011 January 25 khan Election Commission of India din ni – 1950 January 25 champha atana hman tan a ni. Kumin hi hman a nih vawi 16-na a ni a, kumin thupui chu “My India, My Vote” tih a ni.
Chief electoral officer chuan voter tharte an vote dik taka hmang turin a fuih a. Democracy leh inthlan reng reng mipui avanga hlawhtling a ni, tiin, “India democracy chuan mi chi hrang hrang inang lo tak tak a huam avangin ram hruaitu thlanna atana inrelbawlna (electoral machinery) tha neih a pawimawh a, inthlan chu thianghlim, felfai, langtlang, mipui rinkai leh huapzo (inclusive) a ni tur a ni,” a ti. Hemi atan hian electoral roll dik leh thianghlim a ngai a, BLO-te pawhin mapping an kalpui mek a, zaa 87 vel zawh tawh a ni tih a sawi.
NVD hmannaah hian electoral registration officer (ERO), assistant ERO, booth level officer (BLO) bakah voter tharte leh sawm bik NGO, kohhran, political party-te leh thuthar thehdarhtute an tel a ni.
District election officer Aizawl Er Lalhriatpuia sawi danin, Aizawl district-ah MLA bial 12, ERO 12, assistant ERO 6, polling station 324, BLO 324 an awm a. An district-ah hian voter 292785 awmin, mipa 136713 leh hmeichhe 156072 an ni.
Electoral roll revision hnuhnung ber, January 2025 atanga vawiin thlengin voter thar 1219 an awm tawh a ni.
Kalkhawmte hian democracy kalphung leh inthlan thianghlim, dik leh ralmuang chawinung tur leh inthlan apianga hlauhna emaw inthliarna leh inenhranna emaw thlemna emaw inthununtir loa vote thlak turin an intiam a ni.
National Voters’ Day hi kuminah Pathiannia a tlak avangin Mizorama district thenkhatah chuan January 23 khan hman a ni a, a tam zawk erawhin a ni tak, January 25-ah hian an hmang a ni.
National Voters’ Day denchhen hian CEO Mizoram-in district-te hnenah hetiang hian Best Election District Award a sem:
8 Effective Use of Technology in Elections – Champhai (QR code scanner hmang tangkaiin polling party-te training attendance lak a ni; ‘election on duty’ sticker hmansual a nih lohnan inthlan atana lirthei hmanah QR code dah a ni.)
8 Election Management and Logistics – Aizawl (Mizorama mihring tamna berah polling station leh polling party tam tak hnehsawh takin an enkawl a, tlin takin inthlan an kaihruai)
8 Innovative Voter Awareness Initiatives – Mamit (‘Kalchilh Campaign’ hmangin vantlang hmunah nitina inhlawhchawp ‘daily wager’ te vote neitu in a hriat tur tul hrilh thin an ni.)
8 Training and Capacity Building – Aizawl
8 Model Code of Conduct Implementation and Enforcement – Mamit (He category-ah hian National Level Award dawng thei khawpin thlei bik nei loin MCC bawhchhetute an bawhzui a, MCC bawhchhiatna an vil uluk a ni)