Kumin September 5 hi ram pum huap chawlh a nih avangin hemi nia hman thin Zirtirtute Ni chu Mizoram-a school tam zawk chuan sawrkar ruahman angin September 4 khan an hmang.
September 5 hi Mosolman sakhua dintu Mohammad piancham a nih avangin national holiday a ni a. Mizoram sawrkar chuan Zirtirtute Ni pawh hi September 4-a hman turin a rel. Hemi ang hian sawrkar school chuan Ningani khan Zirtirtute Ni hi an hmang a; private school zingah pawh hemi nia hmang hi an awm bawk. Private school thenkhat chuan vawiin – September 5 hian an hmang ang.
Zirtirtute Ni denchhena thuchah a siamah School Education minister Dr Vanlalthlana chuan, state chhungah zirna tihmasawn turin theihtawp an chhuah mek niin a sawi a. Zirtirtu indaihlohna phuhruk turin theihtawp an chhuah a, an sawrkar hnu ah casual teacher – primary school-ah 648, middle school 371, high school zirtirtu 350 leh higher-ah lecturer 50 lak a ni tawh a; primary school casual teacher 234 lakbelhna tur buaipui mek tih a sawi.
Zirtirtu natna khirhkhan tuarte tanpuina tur National Foundation for Teachers Welfare fund-a zirtirtute sum thawhkhawm atangin 2024 September atanga kumin August thlengin zirtirtu 153 hnenah chhawmdawlna cheng nuai 25.6 pek a ni tawh tih a sawi a ni.
Mizoramah Zirtirtute Ni hmang
