Daily Newspaper

Mizoramin Assam sikul chei mek

POST NEWS SERVICE

45

Saihapui V-a Assam sikul, nikuma ramri chungchanga Mizoram leh Assam an inep laia mi tu tih hriat lohvin bomb an tihpuahna chu Mizoram sorkarin a chei tha mek tih thu dawn a ni.

Saihapui V VC member Lalroa sawi danin, Mizoram sorkarin he sikul hi lo chei tura a tih angin an thawmtha a, kar hmasa khan hna hi an tan. Tun karah chuan peih fel theih an inbeisei.

“A chhe nasa fu mai a, a chungte pawh a thlawh darh kha a ni a, a bang te pawh a khi a, chei ve viau a ngai,” a ti a, khawchhiain a tihbuai avangin an thawk chak thei lo tih sawiin, tun karah chuan an zawh fel a beisei tih a sawi.

He sikul hi Dolakhal LP School a ni a, nikuma Saihapui V leh hmun dangahte ram inchuha Mizoram leh Assam boruak a that loh lai khan bomb a puak a, a chhe nual.

Saihapui V khawtlang hruaitute chuan he sikul hi a hma chuan he hming pu hian khaw dang pahnih pathumah a awm thin tih an sawi a, Saihapui V-ah hian 1975-ah a awm tan tih sawiin, Assam sorkar enkawl primary school a ni tih an sawi.

Siamthat a nih hnu-ah eng atana hman tur nge tih an hriat bik loh thu leh sikul atan bawka hman tur a nih an rin thu te an sawi. A chei that hna an thawh chhungin tibuaitu an awm loh thu te, a hma khan Assam lamin vawi hnih khat chu an tlawh tih te an sawi bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy