Sawrkar laipui scheme hrang hrang chu Mizoramah tangkai taka hman a nih thin thu Lok Sabha MP C Lalrosanga chuan a sawi.
Lok Sabha MP hian Zirtawpni khan Saansad Adarsh Gram Yojana (SAGY) Phase VII hnuaia model village atana a thlan Muthi tlawhin hmalakna a enfiah a. Muthi khua in internet chak zawk an neih theih nan Bharat Net a hawng bawk.
Muthi model village-a line department hrang hrang hmalakna atanga hlawhtlinna hmuh a ni chho zel leh ruahmanna awmsa atangin zaa 80 zawh a ni chu lawmawm a tih thu a sawi a. SAGY chu India ram thingtlangte tihhmasawn nana Prime minister ruahman scheme ngaihpawimawh a ni, tiin, SAGY model village 3341 zinga Muthi a tel chu khawtlang tana malsawmna a ni tih a sawi.
Sawrkar laipui scheme-te tangkai taka hman a nih thin thu C Lalrosanga hian sawiin, Mizoram chu a chhawr tangkai ber zing ami a ni tih a sawi. Bharat Net optical fibre hmanga internet chak zawk pekna tur chu zirlai puitu bakah a tangkai thei ang bera hman a nih ngei a beisei thu a sawi bawk.
Muthi-ah hian SAGY Phase VII kaltlangin MP leh MLA Fund bakah line department hrang hrang kaltlangin khawtlang mamawh chhawpchhuah a ni a. Hmalakna langsar zingah street light vuah, thlanmual in sak, Govt. LMM Middle School panna PCC flooring siam, anganwadi teachers training, Nutri-Garden enkawlna, Eco Adventure Circuit sak, Art & Culture Public Relations and Outreach Programme leh Health Camp buatsaih, career guidance /awareness, SAGY leh ICT chungchang inzirtir, solar pumping Muthi Water Supply Scheme siam, folk music artist training kalpui, vermi-composting leh bawlhhlawh sawngbawl dan inzirtirna te a tel a ni.
Mizoramin sawrkar laipui scheme hmang tangkai – Lok Sabha MP
