Mizoram Transport department-in Aizawl-a service taxi leh autorickshaw tana online-a book leh hman man inpek tawnna tur a duan MizoTaxi application chu hmang tan turin a tlangzarh ta a. Hetihlai hian taxi/auto service mek zingah he app hmang tura inziaklut tawh chu a chanve chanve leh pawh an la tling pha lo.
MizoTaxi online application hmang tur hian Rs. 500-a inziahluh a ngai a, July 1 thleng khan lirthei 974 an inziaklut tawh. Four wheeler taxi 275, auto rickshaw 17 leh two wheeler taxi 683 an ni. Hetihlai hian tun dinhmunah Aizawl district-ah two wheeler taxi 3200 chuang, four wheeler taxi pawh heti zat vel bawk, autorickshaw 420 vel a awm tih thu dawn a ni a, hemi atanga chhut chuan he app hmang tura inziaklut tawh hi a zatve zatve leh pawh an la tling lo nia tihna a ni.
The Aizawl Post-in a biakpawhnaah Aizawl Two-Wheeler Taxi Association hruaitu pakhat chuan, tuna inziaklut tam zawk chu midang lirthei khalh, a lirthei neituten inziaklut tura an tih anga inziaklut an ni tih a sawi a. He app hman tum chungchangah an dinna ngaiah an la ding a, a tul angin pawl pathum hian an sawiho zel dawn tih a sawi.
He app hi Mizoram Taxi Association, Aizawl Two-Wheeler Taxi Association leh Aizawl District Auto Rickshaw Owners Association chuan la hman rih loh an duh thu an lo sawi tawh thin a. June 30-a ‘circular’ an tihchhuahah, an inziahluh loh avanga lirtheia eizawngten harsatna an tawk a nih chuan, intihluihna a awm nia ngaih a ni dawn a, pawl pathum hruaituten hma an la zel dawn tih a sawi a ni.
‘MizoTaxi app that tawk lohna leh siamthat ngai nia kan hriat, sawrkara kan thlen a hlawhtlinna kan la hmuh loh avangin, tun dinhmunah he application-a in-register lo turin member kan inhriattir nawn a ni,’ a ti.
Mipuiin taxi an hman dawn apianga chhiah an chawi ve zel tur an duh loh avang leh, STA rate-a an tlan chuan an tan dam khawchhuahna tur a awm phak dawn lo nia an ngaih avangin, an inphurh chhuah hma ngeia rate inberem lawk sa a, an lungawi tlan ve ve na rate-a tlan zel turin member-te an inhriattir tih a sawi bawk.
Hetihlai hian State Transport Authority-in hriattirna a lo tihchhuah tawhah, MizoTaxi app-a inziahluh hun tawp thlenga inziaklut an tlem a, mipui a phuhruk loh chuan MizoTaxi app hmanga tlan tur permit pek chhuah an tum thu an lo sawi tawh a ni.
Nilainia MizoTaxi app tlangzarhtu Transport minister Vanlalhlana chuan, Mizorama public transport tihchangtlunna kawnga rahbi thar pawimawh a ni dawn tih a sawi a. India rama taxi aggregator service lian – Ola, Uber, Rapido awm mah se, Mizote hman tura Mizopa siam ngei Mizoramin a nei ta tih sawiin, heng sumdawng lian zawkten hlawkna an um avanga rate to tak taka an siam ang ni loin, awlsamna avang zawka mipuiin State Transport Authority (STA) rate ang thlapa an hmang thei tur chu a hlu tih a sawi.
Passenger-ten awlsamna an duh a, digital payment hi a tam zawk chuan an duh vek tawh tih minister hian a sawi a. Taxi driver-te pawhin passenger nghak leh zawnga hun tam tak an sen thin chu Mizotaxi app hian a sukiang thei dawn, tiin, mipuiin fair taka sawrkar rate pawmsa ang thlapa an chuan a, driver-te pawhin fare chungchanga inhmuhthiam lohna awm thei an tawh lohna tur leh, passenger tam zawk an hmuh theihna tur hmanrua a nih a beisei tih a sawi bawk.
STA secretary, Transport director Er R Lalrammawia chuan, Mizotaxi app hi mi eizawnna nekchep tura duan a ni loa, mipuiin sawrkar rate dik tak hmanga awlsam zawka taxi an hman theihna tur kailawn a ni tih a sawi a. Platform fee atana 6% an lak chu a tlem berah Rs.5 leh a tam berah Rs.10 lak a ni dawn a, he fee hi Mizotaxi app inrelbawlna senso phuhrutu atana ruahman a ni a, sawrkar sumtuakna hmanrua a ni lo tih a sawi.
National Institute of Technology (NIT) asst. professor, Digiride Technologies Pvt. Ltd director ni bawk Dr Lalhruaizela chuan technical report pein powerpoint hmangin Mizotaxi app hman dan a entir a ni.
MizoTaxi app hmang tan dawn Taxi/auto inziaklut an la tlem
