Daily Newspaper

Mizote tiharh thei tura beisei lehkhabu tlangzarh

8

Nilaini khan Prof JV Hluna lehkhabu “Chakma Homeland Chittagong Hill Tracts” tih chu Pachhunga University College principal Dr Tawnenga’n a tlangzarh a, chief secretary hlui Lalkhama chuan he lehkhabu hi Mizote tiharh thei tur a nih a beisei thu a sawi.

Lehkhabu tlangzarhna hunah hian ramri kana hmun danga khawsak zui chungchang sawihovin symposium neih zui a ni a, Lalkhama hian ‘keynote address’ pein, foreign atanga Mizorama rawn lut ru, inbengbel zuite chungchangah harh a tulh thu leh he lehkhabu hi harh tura mipui turtu a nih a beisei thu a sawi a ni.

“Kan muthluin a lang tlat… Turtu kan ngai… Chu chu khawi atangin nge a lo kal dawn?” Pu JV Hluna lehkha ziak atang hian a lo kal theiin ka ring a,” Lalkhama chuan a ti a, “He lehkhabu atang hian harhna kan chang ang,” a ti bawk.

“Minority kan tih hi 10% aia an tam tawh chuan an kawlh hra tawh mai a ni. 10% aia an tlem chuan an ti a,” tiin a thlir dan a sawi a, Mizoramah foreign atanga dan lova lut an pun theih dan chi hnih sawiin, Bangladesh atangin Chakma an rawn lut tih leh Myanmar-a Arakan vela Rohingya-te an raltlan hian Mizoram an rawn lut thei tih te a sawi. Chumi laka inven a tul thu chu a sawi a ni.

Bangladesh-a tribal an en dan a sawi a, Bangladesh pian tirh lamah Chittagong Hill Tracts-ah Chakma-in inrelbawlna an dil thu leh Bangladesh hruaitute chuan ‘Bengali in nih hunah lo kal leh rawh u,’ an lo tih mai thu te sawiin, “Buaina a awm leh vaih chuan Mizoramah an rawn lut thei,” a ti.

“Keini hi kan ropuina a san poh leh Chakma-ho chu an hniam mai ang,” a ti a, “Dan lekkawh lova kan ngawih rei lutuk chuan kan zinga buaina thlen thei an ni, kan ram tihrehawm thei an ni,” a ti bawk.

MZP president hlui R Vanlalvena, MLA hlui chuan 1956-ah district council-ah ruat seat-ah Chakma dah an ni kha Mizote tihsual hmasa ber nia a hriat thu a sawi a, ani hian 1995 leh 1996 vela electoral roll atanga Chakma foreigner-te paih an nih theih nana MZP hmalak dan a sawi.

Lehkhabu tlangzarhna hun hi Pachhunga University College (PUC) history department-in an buaipui a, an head HS Lalsangpuia’n a kaihruai a ni.

Lehkhabu ziaktu Prof JV Hluna chuan Chakma te chu Chittaging Hill tracts-a awm an nih thu leh chuta tang chuan Mizoram leh hmarchhak state dang thenkhatah an luh thu te a sawi a, 1964-ah Arunachal Pradesh-ah mi 30,000 an luh thu, mahse vawiin thlengin khua leh tui nihna pek an nih loh thu te sawiin, “Mizote Arunachal anga inlungrualna dar vuak ka duh a ni,” tiin a lehkhabu ziah chhan a sawi. Indira-Muji Agreement angin March ni 25, 1971-in a huam lohte chu Chittagong hill tracts-a hawtir vek tura sorkar a phut thu a sawi bawk.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy