Mizoram Journalists’ Association Gen. Hqrs. chuan Nilaini khan chief minister Lalduhoma an hmu a, an pawl mamawh hrang hrang an thlen.
MJA-in hun rei tak atanga an lo beisei tawh Mizoram Journalists’ Pension Scheme chu Mizoram sawrkarin a taka a tihlawhtlin sak chu an lawm tih an sawi rualin, a la famkim tawk loh avangin a tul anga enzui sak turin an ngen a. MJA-in Press Enclave nei tura hma an lakna chu a hlawhtlin ngei theih nan theihtawp chhuahpui tur leh project an siam chu Mizoram sawrkarin a ngaihpawimawh hmasak – top priority list-a telh sak turin an ngen bawk.
Mizoram sawrkarin Advertisement Rules a hman lai chu ennawn a, department hrang hrangin mumal zawka advertisement an kalpui theih nan I&PR department-ah a hlawma budget-a dah a nih theih nan ruahmanna siam sak tur leh, newspaper advertisement rate, centimetre khata Rs.130 ni mek chu Rs.150 aia hniam loa tihsan sak turin an ngen a ni.
Chief minister chuan MJA hruaitute thu thlen chu a tul anga bawhzui a nih tur thu lo hrilhin, advertisement rules ennawn a, department hrang hrangin mumal zawka advertisement an kalpui theihnan I&PR department-ah a hlawma budget-a dah tura an ngenna chu a hranpaa dilna thehlutoin, ani’n a lo enzui tur thu a hrilh. Press Enclave nei tura hma an lakna chu tha a tih thu leh a thlawp thu sawiin, project reng reng state sawrkar sum ei hek lo tur chi chu a thei apiangin buaipui se tha an tih thu a sawi a. Press Enclave pawh a hlawhtlin theih nan theihtawp a lo chhuah tur thu a sawi a ni.
MJA-in CM hnenah mamawh thlen
![](https://theaizawlpost.org/wp-content/uploads/tap_logo-min-large.jpg)