Site icon The Aizawl Post

MJA-in raltlante puihna sum hlan

Mizoram Journalists’ Association (MJA) Serchhip District-in Bangladesh raltlante tanpuina tura charity sum an hmuh, Rs. 36,126 chu Zirtawpni khan Lawngtlai district bawrhsap David Lalthantluanga kutah Lawngtlai District MJA hruaitute’n an hlan.
Tanpuina sum hi kumin Republic Day lawmna chi khat atana Er F Sanglura Band leh Serchhip tualchhung zaithiamten MJA Serchhip District huaihawta Serchhipa Charity Concert an neiha sum an hmuh atanga hlan a ni. Bangladesh atanga sahimna zawnga Lawngtlai district-a tlanlutte tanpuina tura tih niin, Serchhip District MJA aiawhin Lawngtlai District MJA president Lalngheta Ralte chuan a hlan a ni.
Lawngtlai bawrhsap chuan raltlante tanpui nana Serchhip District MJA kaltlanga mi tlawmngai leh inphalte thawhkhawm an dawng chu lawmawm a tih thu sawiin, raltlanten an mamawhna zawnah tangkai taka hman a nih tur thu a sawi.
District administration-in a chhinchhiah danin, Bangladesh atanga an sahimna zawnga tlanlut hi Lawngtlai district-ah mi 531 an awm mek a. District administration atangin an mamawh hrang hrang – chen lailawkna, mutbu, ei leh in leh nitin mamawh ngaihtuahsak a, a theih ang anga tuamhlawm leh chhawmdawl an ni.

Exit mobile version