Daily Newspaper

MJA president-in lemchan bu tlangzarh

9

College leh university-a zirlai lemchan thawnthu bu, Lalchungnunga (L) ziah – “Darlalpuii leh Salam” tih chu December 30, 2020 khan Mizoram Journalists’ Association president Pu Zonunsanga Khiangte chuan a tlangzarh.

MJA Gen. Hqrs. president chuan ziakmite hlut zia sawiin, anmahni kan hnenah awm tawh lo mah se, an kutchhuak erawh a awm reng a, tuna lehkhabu an tlangzarh leh tak pawh kum 20 kaltaa siam tawh a ni tih a sawi. Lehkhabu chu a ziakmi ni lo tan chuan thil tih mai mai chi a nih loh thu leh lehkhabu ziahah pawh lemchan thawnthu lam chu kan hnam ziarang phochhuahna leh vawnnunna tha tak a ni tiin, lemchan thawnthu lam ziah tam a tul tih a sawi a ni.

MJA chuan lehkhabu ziakmite hmakhua ngaiin hma a la ve thin tih Zonunsanga Khiangte hian a sawi a. “Ziakmite hi an hlu a, kan hnam history ziaka dahtute an ni. Kan ziarang, tihdan leh thawnthu zawng zawng dahkhawmna a ni,” a ti.

Tunhnaiah Mizote lehkha chhiar lamah kan tlahniamin, phone lam kan khawihsan tam ta tih MJA president hian a sawi a. Phone-a kan chhiar aiin a ziaka ziak chhiar ngei chu kan hriatnaah a bet nghet zawk tih a sawi.

Mizoram Publication Board-in lehkhabu ziaktu thenkhat a puih thinnaah copy chhut zat tih pun sak emaw heti lama fund tam zawk dah dan ngaihtuah emaw tha a tih thu te, ziakmite tih phur nan leh puihna atan kumtina lehkhabu tha thlanchhuah buatsaihtuten lehkhabu tha an thlante chu sawrkarin a sumfaiin lawmman lo ngaihtuahsak ve thei se tha a tih thu te a sawi bawk.

“Darlalpuii leh Salam” tih lehkhabu thlirlawktu Sangzuala Pachuau chuan tuna lehkhabu tlangzarh tak hi MA leh BA zirlaibu ah dah a nih ve ve tawh thu te, lemchan thawnthu ziah chu thu leh hlaah chuan har ber pawl a nih thu te, Mizo zingah lemchan thawnthu puitling ziak thei chu ‘Ui hum’ lek tak tak chauh an awm thu te, hnamdang lemchan bu ziak Mizo tawnga lehlinte nen tangkawp lo phei se chuan zirlaia a hranpaa zir tham pawh Mizo irawmchhuak pawh a awm meuh loh thu thu te a sawi a. “Pu Machunga (Lalchungnunga) lemchan bu a lo awm hi a lawmawm. He lemchan bu avang hian lemchan lam ziaktu hi an awm belh nual,” a ti.

History leh folktales ah inhnial theih tam tak a awm rualin, tuna Darlalpuii lemchan bu hi chu literature a nih avangin, literature-ah chuan a ziaktu in zalenna a neih angin he lemchan bu ziaktu pawh hian chu chu a hmang tangkai tih a sawi a. “Hetianga bul a lo tan ngam hi a huai hle a ni,” a ti.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy