MJA tan CHA-ah health check up
Trauma Centre zawh thuai tum
Tum danga an lo kalpui tawh thin angin Civil Hospital Aizawl chuan Mizoram Journalists’ Association member-te tan a thlawna inentirna a buatsaih sak.
Thawhtannia health check up program hawnna hmanpuitu Health minister Dr R Lalthangliana chuan Civil Hospital Aizawl (CHA) chu khawpui hmun laili taka awm, damdawi in pawimawh tak a ni, tiin, damdawi in chu a hlui tawh avangin cheithat tuma hma lak mek a ni tih a sawi. ICU khum 10 dah belh a nih tawh thu leh khum 10 dang dah belh leh tumin ruahmanna a awm tih a sawi a. Cardiology leh Oncology Department-ah super specialist doctor lak thar an nih thu leh mamawh phuhruk lailawk nan CSR kaltlangin doctor, nurse leh lab technician te chu NEIGRIHMS ah training tir an nih tur thu a sawi a ni.
CHA main gate bula Trauma Center sak mek chu a rang lama sak zawh tum a nih thu leh a tul anga department hrang hrang khungleng thei tura ruahman a nih thu a sawi a. Trauma Centre hi Casualty aia lian, emergency atana hman tur a ni ber tih sawiin, Lunglei leh Champhai damdawi inah dah a ni tawh a, Serchhipah pawh kalpui tan a ni tawh tih a sawi bawk.
Health care bill sum ba chu a hmasak dan indawta pekchhuah turin buaipui a ni a, tun thla (May) atanga tanin, Asian Development Bank atanga sawrkarin sum a puk tur cheng vaibelchhe 1000 chu July/ August thla velah hmuh theih beisei a nih tawh avangin, beisei anga thil a kal chuan, September thlaah chuan healthcare bill tang mekte chu pek tlak vek hman a nih loh pawhin, a zualpui tal chu inpek theih tum a ni tih Health minister hian a sawi.
Sawrkar hmasa hunlaia thil lo tih theihtawp chhuah ZMC bawhzui zelna hlawhtling ta chu lawmawm a tih thu Dr R Lalthangliana hian a sawi a, sawrkar hmasa chungah lawmthu a sawi tih a sawi a ni.
MJA tan CHA-ah health check up Trauma Centre zawh thuai tum
